Үндсэн хуулийн нэмэлт өөрчлөлтөөр байгуулагдсан шинэ парламент олон ургалч үзэлтэй байж, төлөвшинө гэдэгт итгэж байна гэж УИХ-ын Ёс зүй, сахилга хариуцлагын байнгын хорооны дарга Б.Баярбаатар хэлж байна.

УИХ-ын Ёс зүй, сахилга хариуцлагын байнгын хорооны дарга Б.Баярбаатар:

-Анхны ардчилсан Үндсэн хуулиа баталж, эх орон, тусгаар тогтнол, бүрэн эрхт байдлаа бататган бэхжүүлсэн өдрийн мэндийг та бүхэндээ хүргэе.

Монгол Улсын Анхны Үндсэн хуулийг 1924 оны 11-р сарын 26-ны өдрийн 16 цаг 17 минутад баталсан. Анхны Үндсэн хуулиар хаант улсыг халж Бүгд Найрамдах улсыг тунхагласанаараа түүхэн онцлогтой үйл явдал болсон. Монгол Улсын хүн ам, соёл, амьдрах хэв маяг, эдийн засгийн бүтэц, тогтолцооны хувьд эрс өөрчлөлтүүдийг хийх зорилтуудаас шалтгаалж 1940 оны 6 дугаар сарын 30-нд, 1960 оны 7 дугаар сарын 6-нд тус тус Үндсэн хуулийг шинэчлэн баталж байсан.

1992 оны 01 дүгээр сарын 13-ны өдөр анхны ардчилсан Үндсэн хуулиа баталж, эх орон, тусгаар тогтнол, бүрэн эрхт байдлаа бататган бэхжүүлж, хүмүүнлэг, иргэний ардчилсан нийгэм цогцлуулан хөгжүүлэхийг эрхэм зорилгоо болгон даяар олноо тунхаглаж байсан юм.

Монгол Улсын Үндсэн хууль 6 бүлэг, 70 зүйлтэй. Монгол улсад зах зээлийн эдийн засаг бүхий ардчилсан нийгмийг бүтээн байгуулах тогтолцооны үндсийг энэ хууль тавьж өгсөн. Шинэ Үндсэн хууль нь парламентын засаглалтай бүгд найрамдах улсыг бий болгож, шашин шүтэх эрх, үзэл бодлоо чөлөөтэй илэрхийлэх эрх, хүний эрх зэргийг хуульчлан хамгаалсан.

Үндсэн хууль нь ард түмний эв саналыг нэгтгэсэн хууль хуулийн дээд юм. Үндсэн хуулиа иргэн бүр дээдэлж, сахиж хэрэгжүүлж яваасай гэж хүсдэг.

Монгол Улсын Үндсэн хуульд 2023 онд оруулсан өөрчлөлтөд тусгагдсан сонгуулийн холимог тогтолцоо нь төлөөлөх чадварыг өргөжүүлэх замаар парламентын дархлааг бэхжүүлэхийг зорьсон. Энэ зорилго хэрэгжиж өнөөдөр Монгол Улсын Их Хуралд таван нам, эвслийн төлөөлөл бүхий 126 гишүүн сонгогдож, олон салбар чиглэлээр мэргэшсэн, нас насны төлөөллийг хангасан бүрэлдэхүүнтэй болж, олон ургалч үзэлтэй байж, төлөвшинө гэдэгт итгэж байна гэв

Ямар нэг хуйвалдаан, тохиролцооны байдлаар асуудалд хандаж нийтийн эрх ашиг бус хэсэг бүлгийн эрх ашгийг хамгаалсан хууль баталж болохгүй. 126 гишүүнтэй парламент хэлэлцэгдэж байгаа хуулиудыг маш олон талаас авч хэлэлцэж, маш нухацтай авч үздэг болсон гэв. 

---