Монгол Улсын Засгийн газрын өнгөрсөн оны арванхоёрдугаар сарын 25-ны өдрийн хуралдаанаар 2025 оныг “Нийслэлийн бүтээн байгуулалтыг дэмжих жил" болгон зарласан.

Энэ хүрээнд Нийслэлийн ИТХ-аас орон нутгийн өмчит “Улаанбаатар орон сууцжуулалт” ХХК байгуулах тухай тогтоолыг өнгөрсөн онд гаргасан билээ. Тэгвэл тус шинээр байгуулсан “Улаанбаатар орон сууцжуулалт” ХХК-ийн гүйцэтгэх захирлаар өмнө нь Нийслэлийн Засаг даргын орлогчоор ажиллаж байсан З.Төмөртөмөөг томилсон байна. 

“Улаанбаатар орон сууцжуулалт” ХХК-ийн гүйцэтгэх захирал З.Төмөртөмөө:
“Улаанбаатар орон сууцжуулалт” ХХК нь Хот, тосгоны хөгжлийн ерөнхий төлөвлөгөө болон хэсэгчилсэн төлөвлөгөөний дагуу гэр хорооллыг орон сууцжуулах үйл ажиллагааг хэрэгжүүлэх чиг үүрэгтэй. Мөн гэр хорооллын дахин төлөвлөлт, ашиглалтын шаардлага хангаагүй орон сууцыг нураах, барилгажуулах зэрэг бүтээн байгуулалтын ажлыг хариуцан ажиллана. Итгэл хүлээлгэсэнд талархал илэрхийлье. Хичээн ажиллах болно гэжээ. 

---