Олон улсын жүдо бөхийн холбооны 2024 оны хамгийн отгон тэмцээн болох Токиогийн их дуулга явагдсаны дараа бүх жингийн эрэмбэ эцэслэн гараад байна. 

Эрэгтэй, эмэгтэй тус бүр долоо буюу нийт 14 жинг тэргүүлж буй шилдгүүдийн дотор олимпын мөнгө, дэлхийн аварга МУГТ Б.Баасанхүү монгол бөхчүүдээс ганцаараа бичигдэж байна. Тэрээр өөрийн үндсэн жин болох -48кг жинг 7167 оноогоор тэргүүлж байгаа бол түүний ард дэлхийн аваргын хошой хүрэл медальт Казахстаны А.Абузакинова 5325 оноогоор эрэмбэлэгдэж байна. МУГТ Б.Баасанхүүгийн хувьд өөрийн жингээ тэргүүлж байгаагаас гадна бүх 14 жингийн шилдгүүдээс нийт оноогоороо 6-д жагсаж байна. 

Энэ өдрүүдэд олон улсын жүдо бөхийн холбооноос 2024 оны шилдгүүдээ тодруулах санал асуулгыг цахим орчинд явуулж байгаа ба МУГТ Б.Баасанхүү оны онцлох үйл явдал төрөлд өрсөлдөж байна. Иймд жүдо бөх сонирхогч та бүхэн олон улсын жүдо бөхийн https://judotv.com цахим сайтаар зочилж Б.Баасанхүүд саналаа өгөхийг уриалж байна. Санал хураалт 2025 оны нэгдүгээр сарын 10-ныг хүртэл явагдана.