УИХ-ын Эдийн засгийн байнгын хороогоор Гашуунсухайт-Ганцмод боомтын хил дамнасан төмөр замын холболтын асуудлыг хэлэлцлээ. Олон жил гацсан энэ төслийг яаралтай урагшлуулах ёстой гэдгийг УИХ-ын гишүүн П.Батчимэг онцоллоо.

УИХ-ын гишүүн П.Батчимэг:

-Гашуунсухайт-Ганцмод боомтын хил дамнасан төмөр замын холболтын асуудал Засгийн газраас УИХ-аар орж ирж, Эдийн засгийн байнгын хороогоор хэлэлцэгдэж байгаад сайшааж байна. Энэ хил дамнасан төмөр замын холболтын асуудал анх 2003 оноос яригдаж эхэлснээс хойш үе үеийн Засгийн газрын тэргүүн, гүйцэтгэгч хувийн аж ахуй нэгж, компаниудын сонирхол, зөрчлийн улмаас бүтээн байгуулалтын асуудал хоцрогдож, өдий хүрсэнд маш их харамсдаг.

Өргөн, нарийн цариг гэж хэрэлдсээр байгаад арав гаруй жил болсон. Энэ олон жил гацсан томоохон төсөл хамтарсан Засгийн газар, шинэ УИХ-ын үед урагшлах гэж байгаад баяртай байна. Энэ төсөл одоо урагшлах цаг болсон.

Гэхдээ бид түүхий нүүрсний үнэ дэлхийн зах зээл дээр хэлбэлзэл өндөр байдаг гэдгийг тооцож хэлэлцээрт анхаарах хэрэгтэй. Гишүүд хүний нөөц, үндэсний ажилтан бэлтгэх санал гаргаж байгааг би дэмжиж байна. Энэ төсөл хэрэгжсэнээр монгол хүний ажлын байр нэмэгдэх хэрэгтэй. Эдийн засагт өсөлт бий болох ёстой гэв. 

---