Газ дэлбэрэлтэд өртсөн 207 дугаар байрыг нураах тендерийг дахин зарласан гэдгийг хотын дарга Х.Нямбаатар мэдэгдлээ.

Хотын дарга Х.Нямбаатар:

- 207 байр нураах эхний тендерийн сонгон шалгаруулалтад тавигдсан шалгуур хангах материал ирүүлсэн аж ахуй нэгж гараагүй. Тендерийн хуульд борлуулалтын орлого, хугацаа хэтэрсэн өр зээлгүй байх гэх мэт нийтлэг шаардлагууд байдаг. Тэдгээр шалгуурт нийцэх аж ахуй нэгж байгаагүй тул тендерийг дахин зарласан.

207-р байрыг нураах ажиллагаа нэлээд төвөгтэй. Хоёр байрны дунд баригдсан учир том техникүүд авчирч тэсэлгээний аргаар нураах боломжгүй. Өнгөрсөн жил 10 гаруй барилга нураасан техникүүдээр нураах боломжгүй, гар аргаар нураах шийдвэр гарсан.

Ирэх хаврын улиралд байрыг нурааж, яг энэ барилгын батлагдсан зураг, хэмжээ квадратаар нь орон сууцыг барьж, айл өрхүүдийг оруулна.

Эрүүгийн хэрэг хянан шийдвэрлэх ажиллагааны явцад нийслэл гуравдагч этгээдээр татагдсан. Бид гуравдагч этгээдийн хувиар гэм буруутай нь тогтоогдсон ААН-ээр нураасан, барьсан зардлуудаа нэхэмжилж хохирлоо барагдуулах төлөвлөгөөтэй ажиллаж байна гэв. 

---