УИХ-ын гишүүн Э.Батшугар Зээлийн мэдээллийн тухай хуульд нэмэлт, өөрчлөлт оруулах хуулийн төсөл УИХ-ын даргад өргөн барилаа.

УИХ-ын гишүүн Э.Батшугар:

-Энэ хууль өргөн баригдсанаар "Хар жагсаалт" гэх санхүүгийн ял бүрэн алга болно. Гар утасны лизингийн төлбөрөөс болоод банктай харьцах иргэний харилцааг хааж ял үүрүүлдэг. Энэ тогтолцоог л арилгах юм. Мөн санхүүгийн сахилга баттай иргэдийг урамшуулдаг систем рүү орно. Бага зээлийн хүүтэй, барьцаа хөрөнгө шаардахгүй урт хугацааны зээл олгож болно.

Заавал урьдчилгаа төлбөр төлж ипотекийн зээлд хамрагдах байдал арилна. Санхүүгийн систем онооны систем рүү орж байгаа гэсэн үг. Зээлдэгчийн зээлдэх зэрэглэлийн оноо олгох систем рүү орсноор банк санхүүгийн байгууллагын зээлийн хүү буурдаг. Монгол Улс энэ жишгээр явснаар 2-4 хувь зээлийн хүү буурах бололцоо бүрдэнэ гэсэн үг. Бүх санхүүгийн зах зээл хөгжсөн улс орнууд энэ системээр үйл ажиллагаагаа явуулдаг.

Жишээлбэл, 30 настай иргэн ипотекийн зээлд хамрагдлаа. Тухайн иргэн санхүүгийн сахилга баттай, зээлээ цаг хугацаанд нь төлж ирсэн, 20-30 жилийн хөдөлмөрлөх хугацаа байна. Тэгэхээр заавал урьдчилгаа төлөхгүйгээр сар бүр зээлээ төлөөд ипотект хамрагдах бололцоотой болно гэсэн үг юм гэв. 

---