Утаатай, түгжрэлтэй, тоггүй улаанбаатарчууд ууртай байна. Ерөнхий сайд, Хотын дарга, Эрчим хүчний сайд нарыг шонд дүүжлэхэд бэлэн байна. Үүнийг мэдэрсэн Засгийн газар өнгөрсөн долоо хоногт иргэн бүрд 121 мянган төгрөг тараав. Гэвч монголчууд бараг анх удаагаа мөнгө өгсөнд нь уурлав. Асуудал шийд гэж олонх болгоод байхад шийдэхийн оронд авлигадах гэж оролдлоо гэж бухимдав.

Засгийн газрын тэргүүнийг солих талаар сүүлийн үед багагүй яригдаж байна. Энэхүү яриаг замхруулах займчуулахын тулд олны танил хүмүүсийн хэрэг зөрчлийн бичлэгийг хайр найргүй цацаж байна. Дуучин Рүүкигийн сарын өмнө үйлдсэн бичлэг ил гарч ирж олны харааг хужирлав. Анхаарал сарниах технологи ингэж явдаг болоод удаж байна. Монголчуудын анхаарлыг өөр тийш татах маш амархан болсон.

Талбай дээр жагсаж эхэлсэн Ч.Ганжавхланг олон нийтийн дэмжлэггүй болгож эмнэлэгт хэвтүүлэв. “Жагсагчид бүгд хөлснийх” гэдэг технологи маш сайн хэрэгжиж эхэлжээ. Монголын ард түмэн бухимдахаас хэн нэгэн жагсагчийг дэмжихгүй болсон байна. Гэвч ялагдашгүй цайз дотроосоо нурдаг. Нам дотроо ч сөрөг уур амьсгал давамгайлаад эхэлчихжээ. 

Л.Оюун-Эрдэнийг балбаж байгаа энэ цагт Шадар сайд С.Амарсайхан дараагийн Ерөнхий сайд болно гэсэн бор шувуу нисэв. Манай технологичид иймэрхүү бор шувуу хөөргөчихөөд бүргэд болон элэн халин нисэхийг нь харах дуртай. Үнэндээ бол эрх баригч нам дараагийн Ерөнхий сайдад ЗГХЭГ-ын дарга Н.Учралыг сойж байна.

Н.Учралыг Ерөнхийлөгч дэмждэг гэдгийг бид бичсэн номоос нь мэдэж авсан. Үхээд сэхэхэд нь эргэж очсон талаар үлгэр домог шиг зүйл бичигдсэн байдаг. Мөн тэрбээр Ерөнхийлөгчийн үүсгэн байгуулсан хуучнаар НАМЗХ-ын тэргүүн байсан.

МАН-ын Удирдах зөвлөл түүнийг дэмжиж ЗГХЭГ-ын даргаар тавьсан. ЗГХЭГ-ын даргаар тавина гэдэг дараагийн том албан тушаалд бэлтгэгдэж байгаагийн дохио. ЗГХЭГ-ын даргаар ажиллаж байсан Г.Занданшатар, Д.Амарбаясгалан нар УИХ-ын дарга болсон байдаг. ЗГХЭГ-ын дарга гэдэг бол сайд нарын сайд юм.

Н.Учрал ч энэхүү золтой “учрал”-ыг угтан хуулийн багаа бүрдүүлж эхэлсэн мэдээ байна. Өвчтэй гэдгээр шалтаглаад С.Баяр, С.Батболдод Ерөнхий сайдын суудлыг зүгээр л найр тавиад (намын олон нөхөд минь дэмжинэ гэдэгт итгэж байна) өгчихсөн явдал бий. Ийм зүйл 2028 оны сонгуулийн өмнө болохгүй гэх газар үгүй байна. 

---