Монгол Улс нь Евразийн худалдааны гэрээнд нэгдэх хэлэлцээрийг Засгийн газар хийж буй юм. Энэ хэлэлцээрийг тодорхойгүй хугацаагаар хойшлуулсан байна. Дээрх асуудлын хүрээнд УИХ-ын гишүүн М.Ганхүлэгийн байр суурийг сонслоо.

УИХ-ын гишүүн М.Ганхүлэг:

-Евразийн худалдааны гэрээнд нэгдэх асуудал дээр хөдөө аж ахуйн салбарынхан нэлээдгүй санал хүсэлтүүдээ хэлж байгаа. Талууд асуудлыг хоёр талаас нь авч үзэж байна. Үндэсний аж ахуй нэгж, компаниуд том зах зээл рүү гарах хэрэгтэй байна гэдэг саналтай байна. Ялангуяа хүнсний үйлдвэрүүд бүтээгдэхүүнээ ОХУ руу гаргахад 45-50 орчим хувийн татвар төлдөг. Дээрээс нь квоттой байх хоригуудтай байдаг. Эсрэгээрээ Евразийн орнууд Монгол Улсад бүтээгдэхүүнээ оруулж худалдахад 5 хувийн татвар төлдөг байгаа. Энэ талаас нь харах юм бол Евразийн худалдааны гэрээнд нэгдээд, аж ахуй нэгж байгууллагууд илүү өргөн зах зээл рүү орох боломж байсан.

Гэхдээ одоо бол улстөрчдийг гэхээсээ илүүтэй аж ахуй нэгж байгууллагуудын удирдлагуудын үгийг сонсох хэрэгтэй. Үйлдвэр эрхлэгчид маань гадаадын томоохон компаниудтай өрсөлдөхөд бэлэн болоогүй учраас эсрэгээрээ зах зээлээ алдах, бусад улс орноос хүнсний хувьд хараат болох эрсдэлтэй гэдэг санал хэлж байгаа учраас үүнийг Засгийн газар хэлэлцээд хойшлуулахаар болсон байна.

Цаашид бид зах зээлээ тэлэх ёстой юу гэвэл тийм. Гэхдээ одоо цаг үе нь мөн үү, “Хүнсний хувьсгал” аян хэрэгжүүлж байгаа энэ үед хөтөлбөрөө таван жилийн хугацаандаа хэрэгжүүлээд үр дүнг нь үзэх хэрэгтэй. Тэгэхээр 19 нэр төрлийн бүтээгдэхүүнийг үйлдвэрлэж, дотоодын зах зээлээ хангахын тулд импортын бүтээгдэхүүнийг хязгаарлах чиглэлийн бодлого барьж байгаатай зөрчилдөөд байна. Тэгэхээр бид бизнес эрхлэгчдийнхээ үгийг сонсож, шийдвэр гаргах шаардлагатай.

Евразийн худалдааны гэрээг Засгийн газраас хойшлуулах шийдвэр гаргасан. Би хувьдаа дэмжиж байгаа.

---