Засгийн газар 4 их наядыг тараахын оронд зэс баяжуулах үйлдвэр, төсөлд зарцуулах хэрэгтэй байсан гэж УИХ-ын Аж үйлдвэржилтийн бодлогын байнгын хорооны дарга С.Ганбаатар хэлж байна. 

 УИХ-ын Аж үйлдвэржилтийн бодлогын байнгын хорооны дарга С.Ганбаатар:

-Миний хувьд УИХ-ын Аж үйлдвэржилтийн бодлогын байнгын хорооны даргын хувиар Оюутолгой ХК-ийн удирдлагуудтай хоёр удаа уулзсан. Тухайн үед татварын асуудал, Монголын ард түмэнд хүртээх үр ашгийн асуудлыг хөндөж байсан. Оюутолгой албаар ашигтай ажиллахгүй байна гэж хардаг. Алт зэсийн үнэ өсөж ногдол ашиг тараах болохоор зардалдаа шингээж өөрсдийнхөө ашгийг нуудаг. Оюутолгой компани 17 тэрбум долларын өртэй байгаа. Энэ компанийн 34 хувийг бид эзэмшиж байгаа. Ямар ч хувьцаа эзэмшигч ашиггүй, алдагдалтай, өрөнд орсон компанитай байхыг хүсэхгүй.

Рио Тинто татвартай холбоотой асуудалд монголчуудыг дээрэлхдэг. Татварын олон актийг Ерөнхий сайд нь Дубайд очоод хүчингүй болгож гарын үсэг зурчихсан. Татварын байцаагчийн актыг өөрчлөх эрх Ерөнхий сайдад байхгүй. Энэ бүх асуудалд Арбитрын маргаантай явж байна. Үүн дээр Рио тинто монголчуудад ашиг өгөхгүй гэж улайрч байгаа нь бидний хэт дорд үзэж байгаа хэрэг.

Монгол Улсыг төлөөлж дөрвөн хүн Удирдах зөвлөлд байдаг. Эдгээр хүмүүс монголын ард түмэн, УИХ, Засгийн газарт улирал, жил бүр тайлан тавихгүй байна вэ. Амралтад очсон аятай алга болчих юм. Нүгэл шүү.

Он гараад бид Оюутолгойн асуудалд түр хороо байгуулна.

Засгийн газар 4 их наядыг тараахын оронд хоёр зэс баяжуулах үйлдвэр барих боломжтой мөнгө юм. Энэ үйлдвэрийг барьж чадвал нэмүү өртөг шингээсэн бүтээгдэхүүн экспортлох боломжтой. Үүнийг дагаад эдийн засаг, ажлын байр нэмэгдэх боломжтой байсан юм гэв. 

---