Монгол Улсын Засгийн газар өнөөдөр ээлжит бус хуралдаанаар хэлэлцэн шийдвэрлэсэн асуудлын талаар Монгол Улсын Ерөнхий сайд Л.Оюун-Эрдэнэ мэдээлэл хийв. 

Монгол Улсын Ерөнхий сайд Л.Оюун-Эрдэнэ:

-Монгол Улсын Засгийн газрын үйл ажиллагааны хөтөлбөр батлагдсанаас хойш өнөөдөр 100 хонож байна. 2024 оны арванхоёрдугаар сарын 20-ны байдлаар Монгол Улс түүхэндээ хамгийн өндөр буюу 81.8 сая тонн нүүрс экспортоллоо. Хамгийн боломжит дээд түвшинд хүргэсэн. 

"Үндэсний баялгийн сан" мөнгөжиж байгаа учраас олон улсад менежментийг нь гаргах байгууллагыг байгууллаа. Олон улсад Чингис сан нэршлээр танигдана. Норвеги, Казахстан улсын Баялгийн сан яаж ажилладаг вэ, тэр жишгээр ажиллана гэж ойлгож болно. Сангийн яам, Монголбанк, Гэр бүл, хөдөлмөр нийгмийн хамгааллын яам хамтран нэг жилийн хугацаанд сайн ажилласан байна.

2024 оны Улсын төсөв 1 их наяд төгрөгийн ашигтай гарсан тул үүний 50 хувь нь Тогтворжуулалтын санд төвлөрнө. Үндэсний баялгийн санд 4 их наяд төгрөгийн бодит хуримтлал үүсээд байна. Энэ хөрөнгийг арвижуулах байдлаар захиран зарцуулах эрх нээгдэж байна. Үндэсний баялгийн санд 495 тэрбум төгрөг төвлөрсөн. 

Иргэд хуримтлалын мөнгөө И Монголиагаар дамжуулан дансаа шалгаж үзнэ. Карт хэлбэрээр иргэд баталгаажуулж авч болно. Энэ мөнгийг бэлнээр зарцуулахгүй, хугацаатай хадгаламж.  Энэ нь иргэн бүрийн дансанд 135 мянган төгрөгийн хадгаламж үүссэн гэсэн үг. Энэ хөрөнгийн эрүүл мэнд, боловсрол, орон сууцанд зарцуулахаар хуульчилсан. 

Түүнчлэн 2024 онд "Эрдэнэс Тавантолгой" компани 4.3 их наяд төгрөгийн ашигтай ажилласан. Өнөөдрийн байдлаар иргэн бүрд 350 мянган төгрөгийн ногдол ашиг хүртэх боломж бүрдсэн.

Сүүлийн гурван жилийн хугацаанд иргэд ногдол ашгаа хүртэж байна. Ногдол ашгийг ихэнхдээ 3, 4 сард олгож байсан бол энэ удаа хүйтний улиралд олгох нь чухал гэж үзсэн. Өмнө нь 100 мянга орчим төгрөг олгож, тэр нь инфляцад төдийлөн нөлөөлдөггүй байсан бол багадаа 350 мянга, 400, 500 мянгыг олговол инфляци өдөөх том эрсдэл болно.Тиймээс гурав хувааж олгохоор шийдвэрлэсэн. Агаарын бохирдол зэрэг олон асуудал байгаа учир Хуримтлалын санд үүссэн хуримтлалтай ижил дүнгээр буюу 135 мянгаар олгохоор шийдвэрлэсэн.

2024 оны тайлан гарсны дараа 2025 оны 1, 2-р сард хуулийн дагуу иргэн бүрд 135 төгрөгийн ногдол ашиг олгоно. Ногдол ашгийг өөр зүйлд зарцуулж, хууль зөрчихгүй гэв. 

---