Ерөнхийлөгчийн Тамгын газраас "Хавдар судлалын үндэсний төв II"-ийг барих асуудлаар мэдээлэл хийв.

Ерөнхийлөгч У.Хүрэлсүх өчигдөр ХСҮТ-ийн II эмнэлгийг байгуулахад дэмжлэг үзүүлэх ажлын хэсэг байгуулах захирамж гаргажээ.

Ажлын хэсгийг Ерөнхийлөгчийн Ахлах зөвлөх Н.Хүрэлбаатар ахалж, Сангийн сайд Б.Жавхлан, Эрүүл мэндийн сайд Т.Мөнхсайхан, УИХ-ын гишүүн Ж.Чинбүрэн, Н.Алтаншагай, Л.Мөнхбаясгалан, ЗГХЭГ-ын дэд дарга У.Бямбасүрэн, ЭЗХЯ-ны Төрийн бичгийн дарга И.Батхүү, ХСҮТ-ийн Ерөнхий захирал Н.Эрдэнэхүү нарын бүрэлдэхүүнтэйгээр байгуулжээ.

Ерөнхийлөгчийн ахлах зөвлөх Н.Хүрэлбаатар:

-Хавдрын урьдчилан сэргийлэлт, оношилгоо эмчилгээ, эрдэм шинжилгээ, сургалтын цогцолбор бүхий ХСҮТ-II эмнэлгийг байгуулахад дэмжлэг үзүүлэх үүрэг бүхий ажлын хэсэг байгууллаа. Ажлын хэсгийн бүрэлдэхүүнд Ерөнхийлөгчийн ахлах зөвлөх, Засгийн газрын болон УИХ-ын гишүүд, холбогдох албаныхан ажиллана. 

Олон улсын стандарт шаардлагад нийцсэн, хавдраас урьдчилан сэргийлэх, эрт үед нь оношлох, эмчлэхээс гадна эрдэм шинжилгээний судалгаа шинжилгээ, сургалтын цогцолбор төв байгуулахад дэмжлэг үзүүлнэ. Сонгинохайрхан дүүргийн 34 дүгээр хороо буюу Баянголын аманд 95308 метр талбай бүхий цогцолбор төв байгуулна. 2025 оны төсөвт тус төвийн дэд бүтцийн хөрөнгийг суулгасан.

Эрүүл мэндийн сайд Т.Мөнхсайхан:

-Манай улсын хувьд хавдрын нөхцөл байдал хүнд байгааг хүн бүхэн мэдэж байгаа. ЭМЯ-аас баримталж байгаа гол бодлого бол хавдрыг эрт илрүүлж, эмчлэх. Үндсэн гурван чиглэлийн бодлого явж байгаа. Нэгдүгээрт, хавдрын тусламж үйлчилгээг ард иргэд хэрхэн яаж амьдарч байгаа бүс нутаг, аймаг дүүрэгт нь үзүүлэх вэ?

Хоёрдугаарт, хэрхэн яаж олон улсын түвшинд хүрсэн, шинжлэх ухаан, нотолгоонд суурилсан тусламж үйлчилгээг үзүүлэх вэ. Мөн “Хавдар судлалын үндэсний төв II”-ийг барьж байгуулах ажил байна. Энэ эмнэлгийг барихад 4-5 жилийн хугацаа шаардана. Тиймээс одоо үйл ажиллагаа явуулж байгаа ХСҮТ-ийг илүү өргөтгөж, тусламж үйлчилгээгээ сайжруулах шаардлагатай байна. Энэ мөнгийг улсын төсөвт тусгаж өгсөн байгаа.

УИХ-ын гишүүн Ж.Чинбүрэн

-Ирэх оны төсөвт одоо үйл ажиллагаа явуулж байгаа хавдрын эмнэлгийн ачааллыг 2 дахин бууруулах, дахин өргөтгөх, бэлэн байгаа эмнэлгийг авахаар ажиллаж байна. Энэ ажилд 17 тэрбум төгрөг төсөвлөгдсөн байгаа. Бидний барихаар эхлүүлж буй шинэ "Хавдрын судлалын II төв" эмнэлэг бол 95 мянган метр квадрат бүхий цогцолбор. Орчин цагийн дэлхийд хамгийн шилдэг технологийг эх орондоо авах ийм том амбицтай төсөл явж байгаа. Жижигхэн эмнэлэг барих биш юм биш үү. Туяа эмчилгээний технологи гэхэд маш өндөр өртөгтэй байдаг. Зөвхөн протон эмчилгээ гэхэд 40-50 саяын  ам.долларын өртөгтэй.

Энэ том технологи дээр олон улсын цөмийн энергийн агентлагаас тусламж үзүүлэхээр болсон гэв. 

---