Улсын онцгой комисс өнөөдөр хуралдлаа. Тус хуралдаанаас гарсан шийдвэрийн талаар мэдээлэл хийж байна.

УОК-ын Нарийн бичгийн дарга Т.Баярхүү:

-Зарим сумуудад зудын нөхцөл байдал үүссэн. Иймд 21 аймаг 330 сумаар явж, өвөлжилтийн бэлтгэл ажлыг хангах, холбогдох заавар зөвлөмжийг өгөх мөн “Шинэ хоршоо” хөдөлгөөнтэй холбоотойгоор малчдад тулгамдаж байгаа асуудлыг шийдвэрлэх чиг үүрэг бүхий ажлын хэсгүүд ажиллаж байна. Өнөөдрийн байдлаар ажлын гүйцэтгэл 76 хувьтай үргэлжилж байна.

Хоёрдугаарт, сүүлийн өдрүүдэд нийслэлийн агаарын бохирдол эрс нэмэгдэж буйтай холбогдуулан холбогдох төрийн байгууллагуудын ажиллагааг уялдуулан зохицуулах чиглэлээр УОК-ын хуралдааны шийдвэр гарлаа. Тодруулбал, Нийслэлийн засаг даргаар удирдуулсан Нийслэлийн онцгой комиссын шуурхай штабыг байгуулж, 24 цаг тогтмол хяналт тавьж ажиллах үйл ажиллагаа явуулж байна.

Мөн Агаарын бохирдлыг бууруулах үндэсний хороог дахин байгуулж Засгийн газарт хүргүүлж шийдвэрлүүлэх үүрэг өгөв.

Үүнээс гадна нийслэлийн агаарын чанарыг сайжруулах хяналт шалгалтын ажлыг эрчимжүүлнэ. Нийслэлийн 2500 төрийн алба хаагчид айл өрхүүдээр шалгалт явуулж, угаарын хийн хордлогоос сэргийлэх зөвлөгөө өгөх болно. 

Мөн Байгаль орчин, уур амьсгалын өөрчлөлтийн сайд болон эрчим хүчний сайд, Нийслэлийн холбогдох удирдлагуудад сайжруулсан шахмал түлшний чанар стандарттай холбоотой хөндлөнгийн дүгнэлт, ялангуяа шаардлага хангасан гадаадын байгууллагын чанар стандартын тодорхой шинжилгээг хийж, үр дүнг УОК-т танилцуулах хугацаат үүрэг өгсөн гэв.

---