Монгол Улсын Ерөнхийлөгч У.Хүрэлсүх утааны асуудлаар Засгийн газрын гишүүд, УИХ дахь намын бүлгийн дарга нартай уулзалт хийв. Энэ үеэр хэлэлцэж, ярилцсан асуудлын талаар Ерөнхийлөгчийн хэвлэл мэдээллийн албаны дарга Ө.Золбаяр мэдээлэл өгөв. 

Ерөнхийлөгчийн хэвлэл мэдээллийн албаны дарга Ө.Золбаяр:

-Ерөнхийлөгч өнөөдөр Шадар сайд болон Засгийн газар, УИХ-ын зарим гишүүдийг дуудаж мэдээлэл авч, өөрийн байр суурийг илэрхийлсэн. Мөн хууль хяналтын байгууллагын төлөөлөл оролцсон.

Яригдсан хамгийн гол утааны асуудал нь шахмал түлшний асуудал. Энэ хүрээнд Ерөнхийлөгч 2019 онд шахмал түлшийг анх үйлдвэрлэж эхэлж байхад утаа 40-50 буурч байсан. Шахмал түлш илүү сайжраад явах ёстой байтал яагаад муудаад байгаа талаар ярьсан. Мөн хяналт, шалгалтын асуудал нэлээд суларсан байгаа тал дээр Ерөнхийлөгч байр сууриа илэрхийлж, шахмал түлшний шатаалт, орц найрлагыг шалгаж хянахыг сануулсан.

Төр засгийн байгууллага уялдаа холбоогоо сайжруулж ажиллахыг сануулсан. Энэ нь нэг байгууллагын асуудал биш юм.

Өнөөдрийн уулзалтад Ерөнхий сайдыг оролцох хүсэлт тавьсан. Хүндэтгэх шалтгааны улмаас хуралд оролцоогүй. УИХ-ын дарга, намын бүлгийн дарга нар хуралд оролцсон.

Чийгшил ихтэй түлшний улмаас утаа ихэссэн гэдэг дүгнэлтийг мэргэжлийн байгууллагаас гаргасан байгаа.

Улс орнууд тухайлбал, Лондон, Парис анх түүхий нүүрс түлж дулаацдаг, өвөлждөг байсан. Дараа нь шахмал түлш, түүний дараа хагас коксожсон түлш рүү шилжсэн. Үүний дараа төгс шийдэл буюу газ түлж агаарын бохирдлоо шийдсэн. Манайх ч түүхий нүүрс түлдэг байж байгаад Ерөнхий сайдаар У.Хүрэлсүх Ерөнхийлөгч ажиллаж байхдаа халсан. Тэр хөгжлийнхөө үе шатын дагуу түүхий нүүрс түлдэг байж байгаад халсан.

Төрийн байгууллагууд уялдаа холбоогоо сайжруул. хариуцаж байгаа эзэн нь хэн байна аа гэдэг асуудал тавиад байгаа. Ийм асуудал тавина гэдэг өөрөө үр дүн гарахын эхлэл шүү гэв. 

---