Засгийн газрын Хяналт хэрэгжүүлэх газрын дарга Ч.Өнөрбаяр цаг үеийн асуудлаар мэдээлэл хийв. 

Засгийн газрын Хяналт хэрэгжүүлэх газрын дарга Ч.Өнөрбаяр:

-БЗС-ийн асуудал дээр ажлын хэсэг гараад ажилласан. Түүнчлэн газрын албатай холбоотой асуудалд иргэдээс ихээхэн гомдол мэдээлэл ирсэн. Холбогдох дүгнэлтүүдийг хүргүүлсэн байгаа.

Тухайлбал, Цагийн эрч ХХК-тай холбоотой асуудал. 2020 онд нийслэлийн засаг дарга давхардуулж газар олгожээ. Ингээд таван удаагийн шүүхийн шийдвэр гараад энэ аж ахуйн нэгжийн талд гарсан. Гэсэн ч нийслэлийн газрын алба тус шүүхийн шийдвэрийг биелүүлэхгүй байгаа. Ингээд манайхаас энэ асуудлыг шалгахад зөвлөл гээд хүмүүс л тус асуудлыг хойшлуулаад байсан байдаг.

УИХ, Засгийн газрын түвшинд газрын асуудлаар газрын албанд үүрэг чиглэл өмнө нь өгч байсан юм билээ. Гэхдээ үүнийг хэрэгжүүлдэггүй. Хуульд зөвлөл гэж байгууллага байхгүй. Ийм эрх мэдэлд ч тэр хүмүүст байхгүй. Тэгээд өөрсдийгөө тайлбарлахдаа "журамтай" гэдэг. Түүнийг нь даргын баталсан журмаар эрх мэдлийг олж авч болохгүй. Эрх мэдлийг Үндсэн хуулиар, эсвэл хуулиар олж авдаг. Энэ эрх мэдлийг зөвлөл гэх нэрээр булааж авсан байна.

Засгийн газрын эрх мэдлийг хэн нэгэн дунд шатны байгууллага булааж авч байна гэж харж байна.

Дараагийн асуудал, Боловсролын зээлийн сангийн асуудал. Өнгөрсөн 32 жилийн хугацаанд тус сантай холбоотой нийт 55 тогтоол гаргаж байжээ. Энэ хугацаанд 43 удаа өөрчилж, 26 удаа нэмэлт орж байжээ. Ингээд хийдэл үүсэж эхэлжээ. 462 суралцагчийн 12 сая 635 мянган ам.доллар, 159 суралцагчийн 2 сая 941 мянган ам.долларын хүүгийн авлагатай байна. Түүнчлэн гэрээний үүргээ биелүүлээгүй 3 сая 438 мянган ам.долларын санхүүжилтийг авсан 147 зээлдэгчидтэй холбоотой зээлийн эргэн төлөлтийн мэдээлэл байхгүй. Мөн л сайд ажлын хэсэг гаргаад ажиллуулдаг. Ямар үр дүн гаргасан нь тодорхойгүй үлддэг.

Эцэст нь дүгнээд хэлэхэд, хуулиар эрх мэдэл олгоогүй ажлын хэсэг, зөвлөл нэртэй байгууллага нь маш их зүйлс будилуулдаг юм байна. Хэн нэгэн даргын баталсан журмаар өөрөө өөртөө хуулиас давсан эрх мэдлийг олж авдаг. Ингээд шударга бус байдлыг бий болгодог байдлыг өөрчилнө. Төрийн дэргэдэх тусгай сангуудын асуудлыг эргэж харж, өөрчлөх шийдвэртэй арга хэмжээг авч хэрэгжүүлнэ үзэж байгаа гэв. 

---