Евразийн худалдааны хэлэлцээрт нэгдсэнээр бүтээгдэхүүнээ экспортолж чадах эсэх нь гол асуудал гэж УИХ-ын дэд дарга Х.Булгантуяа хэлж байна.

УИХ-ын дэд дарга Х.Булгантуяа:

-Дотоодын зах зээл дээр ч бэхжиж чадаагүй компаниуд гадаадын зах зээл дээр гарна гэдэг хэцүү. Манай улсын тухайд хэдэн ноос ноолуурын компаниас өөр гадаад руу экспорт хийж байгаа компани бараг байхгүй байна.
Энэ асуудлыг УИХ-ын чуулганы хуралдаанаар энэ асуудал хэлэлцэгдэх үеэр гишүүд үүнийг тодруулж асууна гэж бодож байна. Тодруулбал, яг ямар бараа бүтээгдэхүүнийг экспортолж, ямар бараа бүтээгдэхүүнийг импортоор авах вэ гэдгийг асууна.

Бид өнөөдөр европын орнуудад татвар чөлөөлөлтөөр 7000 гаруй бараа бүтээгдэхүүн гаргах эрхтэй. Гэтэл гарсан зүйл бараг л байхгүй байна. Учир нь манай дотоодын компаниуд европын стандартад нийцсэн үйлдвэрлэлээ явуулж чадахгүй байна. Төсөв санхүүгийн дэмжлэг байхгүй байна.

ОХУ бол үйлдвэрлэгч орон. Манайд тус хэлэлцээрийн хүрээнд бараа бүтээгдэхүүнээ оруулж ирж, хямдаар зарж эхэлсэн тохиолдолд дотоодын гурилын үйлдвэрүүд байтугай бусад салбар хэцүүдэх эрсдэлтэй.

Өнгөрсөн хугацаанд гурилын монопол байдалтай тэмцье гэдэг том бодлого явсан. Өнөөдөр үйлдвэрлэгч нарт амаргүй тусаж байна. Нөгөө талдаа хэрэглэгчдэд хямд бараа бүтээгдэхүүнийг худалдан авах ёстой гэв.

---