2025 оны төсвийг хэлэлцэж байна. Зам тээврийн яамнаас нэг их наяд төгрөгийн өртөгтэй зам барих найман төслийг танахаар болжээ. 

Зам тээврийн сайд Б.Дэлгэрсайхан:

-Манай яамны цалингаас бусад урсгал зардлыг 10 хувиар танаж байгаа. Шатахуун, гадаад томилолт, бичиг хэргийн зардлыг 50 хувиар багасгасан. Хөрөнгө оруулалтын тухайд нийтдээ 38 төсөл хөтөлбөр хэрэгжихээс 29 нь үлдээд есийг нь хассан байгаа. Үүнд Тэрэлжийн дөрвөн эгнээ зам, Дархан-Алтанбулаг чиглэлийн дөрвөн эгнээ зам, Дадал сумын 59 км зам, Халхгол-Хэрлэнгийн 69 км замын төслүүд  хасагдсан. Энэ нь бараг 1 их наяд төгрөг болж байгаа. Төсвийн хөрөнгө оруулалтын 23 хувь нь дэд бүтцийн салбарт байсан.

Дархан-Алтанбулаг чиглэлийн дөрвөн эгнээ замын бүтээн байгуулалтыг хэрэгжүүлэх өөр арга байгаа гэж үзэж байна. Төр хувийн хэвшлийн түншлэлээр хийх боломжтой.

Богд уулын туннелийн ажлын зураг төслийн ажил явагдаж байна. 5.5 их наяд төгрөгөөр барина гэдэг худал мэдээлэл яваад байна. Бүтэн жил гаруйн хугацаанд би судалгаа хийж байна. Богд уулын амаар дүүрэн хаусууд байна. Ухаж ороод хаус барьчихсан. Чингисийн хүрээнээс эхлээд Одон орон хүртэл баячуудын хаус байна. Дээр нь баячууд хаус бариад бааж шээж болж байхад ард түмэн тийшээ гарах гарц яагаад хийж болдоггүй юм бэ. 

Дээр нь гарч сууж байшингаа барьж суучихаад дархан цаазат уул гээд пиар хийж мөнгө төлөөд байгаа улсуудыг иргэддээ зориуд харуулна.

Мянгахан төгрөг төлөөд 1000 км газар яваад байж болохгүй. Авто замуудаа өөд татахын тулд хураамжийг нэмэгдүүлнэ. Замын төлбөрөөрөө замаа засна. Улсын төсвөөс мөнгө гаргахгүй гэв. 

---