Засгийн газрын хуралдаан үргэлжилж байна. Энэ үеэр Гэр бүл, хөдөлмөр, нийгмийн хамгааллын сайд Л.Энх-Амгалангаас төсвийн төслийн талаар байр суурийг нь сонслоо.

Гэр бүл, хөдөлмөр, нийгмийн хамгааллын сайд Л.Энх-Амгалан:

-Хуучин тодорхой салбарууд дээр гаднаас ажиллах хүч авахад квот өгдөг байсан. Хоёрдугаарт хөдөлмөрийн хөлсний доод хэмжээг хоёр дахин нэмэгдүүлсэнтэй тэнцэх төлбөр авдаг байсан. Үүнийг өнгөрсөн таван сард Засгийн газрын шийдвэр гараад уул уурхай, банк санхүү, мэдээлэл технологиос бусад салбарт квот тавихаа болъё гэж байгаа. Гэхдээ хөнгөлөлтийг нь 50 хувь болгоё гэж байгаа. Гэхдээ хуулийн заалтад нь өөрчлөлт оруулах шаардлага үүссэн. Удахгүй УИХ-д тус хуулийн төслийг өргөн барина.

Миний багцад хүүхдийн мөнгө, тэтгэвэр тэтгэмж байдаг. Хүүхдийн мөнгөнөөс нэг ч төгрөг хасахгүй. Тэтгэвэр, тэтгэмж, төрийн албан хаагчдын цалингийн зургаан хувиар нэмэгдүүлнэ.

Халамжийн мөнгө 2.2 их наяд төгрөг байдаг. Үүний 1.6 их наяд нь хүүхдийн мөнгө. 600 тэрбум төгрөг нь группт байгаа хүмүүст зориулагддаг мөнгө.

Манай салбарт 110 гаруй байгууллага байна. 5200 орчим албан хаагчид байна. Эдгээр албан хаагчдын урсгал зардал 10 хувиар хасагдана. Цалин, үйл ажиллагаа, томилолт, тавилга, тоног төхөөрөмжийг зардал хасагдана гэсэн үг. Үйл ажиллагаагаа хэвийн явуулахад хүндрэл учруулах эрсдэлтэй гэж харж байна гэв. 

---