МҮХАҮТ-ын гүйцэтгэх захирал Т.Дүүрэнг хэд хоногийг өмнө авлигын хэргээр баривчилж, нэг сарын хугацаатай хориод байна. Өчигдөр Монголын Үндэсний Худалдаа Аж Үйлдвэрийн Танхим /МҮХАҮТ/-ын ерөнхийлөгчийн сонгууль болж, Л.Төр-Од танхимын ерөнхийлөгчөөр сонгогдсон байна. МҮХАҮТ-ын ерөнхийлөгчөөр ажиллаж байгаад ажлаа өгсөн УИХ-ын гишүүн Д.Энхтүвшингийн байр суурийг сонслоо.

УИХ-ын гишүүн Д.Энхтүвшин:

-Өчигдрийн МҮХАҮТ-ын ерөнхийлөгчийн сонгуультай холбоотой асуудлаар байр сууриа илэрхийлье. Өмнөх өдөр нь Т.Дүүрэнг шүүхийн шийдвэрээр баривчилсан. Зарим хүнийг хардах үндэслэл байгаа. Сонгуультай холбоотойгоор баривчлах ажлыг зохион байгуулсан. Хөдөө орон нутгийнхныг хайрцагласан байна. Орон нутгаас 420 гишүүн төлөөлөгчөөр их хуралд ирсэн. Өмнө нь танхимд орон нутаг хариуцаж ажиллаж байсан хүн ялалт байгуулсан. Надтай мөн орон нутгийнхныг хайрцаглаж, өрсөлдөж байсан.

Мөн уржигдрын баривчилгаа нь таагүй санагдлаа. Хэн сонгогдох нь надад тийм чухал биш. Бизнес хийж байсан хүн сонгогдоосой гэж хүсэж байсан. Хамгийн гол нь сонгуулийн өмнө баривчилгаа явуулж байгаа нь муухай байна. Тэр хүнд асуудал байж болно. Л.Төр-Од ялахын тулд өөрийг нь ажилд авсан хүнийг зохион байгуулалттай ажиллагаа явуулсан нь ёс зүйгүй санагдаж байна.

Л.Төр-Од АТГ-ын олон нийтийн зөвлөлд байсан. Олон хүнийг авлигын хэргээр шалгуулж, асуудал үүсгэж явж байсан хүн. Баривчлах ажлыг аль эрт, эсвэл хурлаас хойш хийж болох байсан.

Нөгөөтээгүүр МҮХАҮТ-ын ерөнхийлөгч нь бизнес эрхэлж байсан хүн баймаар байгаа байхгүй юу. Гэтэл энэ хүн нэг ч олигтой бизнес хийж үзээгүй. Дандаа төрийн байгууллагуудаар эрвээхэй шиг үсэрч явж байсан ийм хүнээр удирдуулах болсонд харамсаж байна.   

Манай байгууллагын дүрэмд ч асуудал байна гэв.

---