Монгол Улсын 2025 оны төсвийн тухай хууль болон хамт баталсан хууль, тогтоолд бүхэлд нь тавьсан Монгол Улсын Ерөнхийлөгчийн хоригийг Монгол Улсын Их Хурал хүлээж авсантай холбогдуулан хууль, тогтоолд нэмэлт, өөрчлөлт оруулах асуудал хэлэлцэх дэгийн тухай хуулийн төслийг УИХ-ын чуулганаар хэлэлцэж эхэллээ.

Ерөнхийлөгчийн хоригийг хэрхэн хэлэлцэх дэгийн асуудлыг Ёс зүй, дэгийн байнгын хороо, Хууль зүйн байнгын хороо хамтарч хуралдаж ажлын хэсэг байгуулсан. Мөн дээрх хоёр байнгын хороо өчигдөр дахин хуралдаж, дэгийн төслөө УИХ-ын чуулганд танилцуулахаар тогтсон юм. Төсвийн байнгын хорооноос 2025 оны төсвийн хүрээнд Засгийн газраас санал авч, нэгтгэн байнгын хороод болон чуулганаар хэлэлцүүлэх нь зүйтэй гэсэн саналыг дээрх хамтарсан хуралдаанаас гаргасан. Дээрх тогтоолын төслийг чуулганы хуралдаанд УИХ-ын гишүүн Ч.Лодойсамбуу танилцууллаа. 

---