Завхан аймаг, Алдархаан суманд суудлын автомашин цасанд суусан тухай дуудлага 11.13-ны өдрийн 05:50 цагт тус аймгийн Онцгой байдлын газарт иржээ. 

Завхан аймаг, Алдархаан сум Богдын гол багийн “Ганцын даваа” гэдэг газар /аймгийн төвөөс урд зүгт 25  км, сумын төвөөс зүүн урд зүгт 40 км/ суудлын автомашин цасанд суусан тухай дуудлагыг 11.13-ны өдрийн 05:50 цагт тус аймгийн Онцгой байдлын газар хүлээн авчээ.

Дуудлага мэдээллийн дагуу тус аймгийн Онцгой байдлын газрын эрэн хайх, аврах бүлгийн  алба хаагчид  Баянхонгор аймгаас Завхан аймгийн Улиастай сумын чиглэлд хоёр зорчигчтой зорчиж явсан иргэн Б /37 настай, эрэгтэй/-ын  “Алпард” загварын суудлын автомашиныг цаснаас татан гаргажээ.

Иймд иргэд та бүхнийг холын замд гарахдаа цаг агаарын урьдчилсан мэдээг харж, хувийн бэлтгэлээ базаахыг анхааруулж байна. 

---