МСНЭ-ээс сэтгүүлч Н.Өнөрцэцэгийн давж заалдах шатны шүүхтэй холбоотой хүсэлтийг Нийслэлийн давж заалдах шатны шүүхэд өглөө. 

МСНЭ-ийн ерөнхийлөгч Ө.Отгонбаатар: 

-МСНЭ-ийн зүгээс Нийслэлийн эрүүгийн хэргийн давж заалдах шатны ерөнхий шүүгчийн туслахтай уулзлаа. Сэтгүүлч Н.Өнөрцэцэгийн шүүх хурал арваннэгдүгээр сарын 7-ны өдөр товлогдсон байгаа. УИХ-ын гишүүн Ч.Лодойсамбуу хувийн зүгээс шүүх хуралд ажиглагчаар суух хүсэлт өгсөн. Мөн салбарын мэргэжлийн бүх байгууллагууд нэгдэж хавсралтаар гарын үсгээ зурсан хүсэлтээ өглөө.

Сэтгүүлч Н.Өнөрцэцэгийг шүүхээс дөрвөн хэрэгт буруутгаж, дөрвөн жил 9 сарын хорих ялаар шийтгэл ногдуулсан. Шүүхээс хэргийг хэлэлцэхдээ төрийн нууцад хамаарах мэдээ баримтыг хадгалсан гэмт хэргийг хэлэлцэх тул шүүх хурлыг бүхэлд нь хаалттай хэлэлцэнэ хэмээн тайлбарласан. Харин шүүгдэгч, өмгөөлөгч, хэвлэл мэдээллийн байгууллагуудын зүгээс төрийн нууцад хамаарахаас бусад хэргийг нээлттэй хэлэлцэх боломжтой хэмээн үзэж байгаа.

Мөн МСНЭ-ээс шүүх хуралд ажиглагчаар оролцох, хэсэгчлэн нээлттэй хийх шүүх хурлыг олон нийтэд шууд дамжуулах хүсэлтийг гаргаж байна гэлээ.

---