УИХ-ын гишүүн Ч.Лодойсамбуу Нийслэлийн эрүүгийн хэргийн давж заалдах шатны шүүхийн тамгын газарт Н.Өнөрцэцэгийн шүүх хуралд ажиглагчаар оролцох хүсэлт хүргүүлж байгаагаа мэдэгдэв. 

УИХ-ын гишүүн Ч.Лодойсамбуу:

-НҮБ-ын Ерөнхий ассамблей 2013 оны тогтоолоор жил бүрийн 11 дүгээр сарын 02-ны өдрийг сэтгүүлчдийн эсрэг үйлдсэн гэмт хэргийг, гэмт хэрэг ял шийтгэлгүй байгааг эсэргүүцсэн тогтоол гаргасан энэхүү өдрийг тэмдэглэлт өдөр болгосон. Өөрөөр хэлбэл, сэтгүүлчдийн үйл ажиллагаанд хөндлөнгөөс нөлөөлсөн, дарамталсан  этгээдэд хариуцлага тооцохыг шаардсан хөтөлбөр гаргасан. Үүнд сэтгүүлчдийг эрүүдэн шүүх, сэтгэл санаагаар дарамтлах, чөлөөтөө ажлаа хийх боломжоор хангахгүй байхыг эсэргүүцсэн хөтөлбөр юм. Энэ өдөр маргааш буюу 11 дүгээр сарын 02-нд тохиох гэж байна.

Монгол Улсын Үндсэн хуулийн 54-р зүйлийн 54,1-т хуульд тусгайлан зааснаас бусад тохиолдолд хэргийг ил таслан шийдвэрлэнэ. Мөн шүүх ил тод нээлттэй байна гэсний дагуу нийслэлийн сэтгүүлч Н.Өнөрцэцгийн давж заалдах шатны шүүхэд миний бие ажиглагчаар оролцох хүсэлт гаргаж байна. Энэ хүсэлтийг шийдвэрлэж, боломжоор хангаж өгөхийг хүсэж байна. Сэтгүүлч Н.Өнөрцэцгийг ямар нэгэн байдлаар буруугүй, сулла гээгүй. Гэхдээ ажиглагчаар сууж,шаардлагатай тохиолдолд нууцын баталгаанд гарын үсэг зурж, шүүхийн талаар ямар нэгэн мэдээлэл өгөхгүй байх баталгааг өгч чадна.

Өнөөдрийг хүртэл миний бие шүүх засаглалд итгэж, хамгаалж ирсэн. Шүүх засаглалын итгэл алдрах юм бол бүх зүйлийг алдана шүү гэдгийг хэлсээр ирсэн. Гэхдээ өнөөдөр миний энэ итгэл буурч байна. 

Тиймээс нууцын зэрэглэлтэй энэ шүүх хурлыг өөрийн биеэр ажигламаар байна. Нууцыг хадгалсан, авсан, дамжуулсан бүх этгээд хэргээ хүлээмээр байна. Ганцхан хүнд бүх хэргийг тохож болохгүй. Хэвлэлийн эрх чөлөө зөвхөн сэтгүүлчдийн асуудал биш шүү дээ. Хэвлэлийн эрх чөлөө бол ардчиллын эрх чөлөөний дархлаа.  

Мөн эрүүгийн хуульд өөрчлөлт оруулах хуулийн төсөл боловсруулж Засгийн газраас санал авахаар хүргүүлсэн байгаа. Эрүүгийн хуулиас ил тод мэдээлэл тараах гэсэн заалтыг авч хаяхаар хуулийн төсөл санаачилсан бөгөөд энэхүү заалт нь зөвхөн хэвлэл мэдээлэл  биш олон нийтийг үзэл бодлоо илэрхийлэхийг шууд хааж, Үндсэн хуулиа зөрчсөн заалттай маш олон жил явсан гэж үзэж тус хуулийн төслийг санаачилсан гэв.

---