УИХ-ын чуулганы хуралдаанаар Цөмийн энергийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцсэн. Хуулийн төсөлтэй холбогдуулан Үндэсний эвслийн тэргүүн Н.Номтойбаяр үг хэллээ. 

УИХ-ын гишүүн, Үндэсний эвслийн тэргүүн Н.Номтойбаяр:

-Цөмийн энергийн тухай хуулийн төслийг зармын хувьд дэмжиж байна. Шалтгаан нь гадаад харилцааны таатай цонх үе манай улсад тохиогоод байна. Энэ үед ийм чухал гадаад харилцаа, эдийн засаг, эдийн засгийн аюулгүй байдал хангагдах нөхцөл үүсэж байгаад талархаж байна.

Монгол Улс нүүрс, зэс экспортлохоос өөр илүүцгүй ядруухан эдийн засагтай. Нөгөө талаараа эдийн засгийн бодлогын хүрээнд олон жил дуншиж гацсан ажил урагшлах эхлэл болж байна. Гэхдээ анхаарах хэд хэдэн зүйл байна.

Хууль эрх зүйн орчин нь хэлэлцээр хийх таатай нөхцөлийг бүрдүүллээ гээд хэлэлцээрт өмнөх алдааг давтахгүйгээр, улс орныхоо язгуур эрх ашгийг хамгаалсан, эдийн засаг, гадаад харилцааны бодлогыг чухалчилж үзсэн байр сууринаас хандах хэрэгтэй. Үүний хажуугаар элдэв авлига, далд тохироо хэрхэвч байж болохгүй. 

Хэлэлцээрийн үе шат эхлэхэд ил,тод нээлттэй явах ёстой гэдгийг анхааруулж хэлмээр байна. Хоёрдугаарт, нэг зүйлд атаархаад байх юм. Яаралтай горимоор орж ирж байна. Манайхан гадны, хүчирхэг мөнгөтэй компанийн өмнө өвдөг нь сулраад тайчих нь холгүй болдог. Дотоодынхоо компани аж ахуйн нэгж, компаниудыг дээрэлхээд доромжлоод, хааж боогоод байдаг. Ялгавартай ханддаг хандлагаа өөрчилмөөр байна. Гэрээний нөхцөлүүдийг дагалдаад орж ирж байгаа хуулийн өөрчлөлтүүдийг харахаар атаархмаар байна. Маш сайхан таатай нөхцөлүүдийг бүрдүүлж байна. Энэ жишгээрээ явмаар байна.

Үүнтэй уялдуулаад гадаадын хөрөнгө оруулалтыг татах таатай нөхцөл байдлыг монголын төр бүрдүүлчихээд гадны хөрөнгө оруулагч орж ирээд байгаа юм ердөө биш. Яах аргагүй ураны нөөц, түүхий эд дэлхийд ховордчихоод үйлдвэрлэлийн хүчин чадал Монгол руу чиглээд байна. Энэ гэрээ хэлэлцээрээ хийхдээ булган сүүлтэй баймаар байна. Монголын төр гадны хөрөнгө оруулалтад ийм харилцан ашигтай байдлаар хандаж байгаа гэдэг үлгэр жишээ болохуйц гэрээ байгуулж, өөр бусад олон салбарт гадаадын хөрөнгө оруулалт татах ийм боломжийг бүрдүүлэх хэрэгтэй гэж бодож байна. Үлгэр жишээ гэрээ байгаасай гэж хүсэж байна. Хэлэлцээр их чухал. Хууль батлах нэг хэрэг. Хамгийн гол нь хэлэлцээр учраас ил тод нээлттэй, улс орныхоо язгуур эрх ашгийг хамгаалсан, холыг харсан хэлэлцээр хийгээсэй гэж хүсэж байна. Амжилт хүсье гэв. 

---