УИХ-ын чуулганы хуралдаанаар Монгол Улсын хөгжлийн 2025 оны төлөвлөгөө батлах тухай” Улсын Их Хурлын тогтоолын төсөл гурав дахь хэлэлцүүлгийг хийх явцад эрчим хүч, дулааны үнийг нэмэгдүүлэх эсэхийг УИХ-ын гишүүд салбарын сайдаас тодруулж байв.  

Эрчим хүчний сайд Б.Чойжилсүрэн:

-Харамсалтай нь эрчим хүчний үнэ тариф сүүлийн 30 жилийн хугацаанд үе үеийн Засгийн газар, эрх баригч, дарга нар нь нэмэгдүүлэхгүй явсаар байгаад өнөөдрийн хүндрэлүүд үүссэн. 1.8 их наяд төгрөгийн урт хугацаатай зээл байгаа нь үнэн. Яг өнөөдрийн байдлаар 539.6 тэрбум төгрөгийн богино хугацааны өр төлбөртэй байгаа нь бас үнэн. Цахилгааныг 285 төгрөгөөр үйлдвэрлээд, дамжуулаад, түгээх, хангах зардал гарч байгаа гэсэн үг. Бид иргэдэд 140 төгрөгөөр борлуулж байгаа нь бас үнэн. Улаанбаатар хотын дулаан хангамжийн тухайд айл өрхүүдийн 1 мкв-ыг бид 506 төгрөгөөр борлуулж байгаа. Яг өөрийнх нь өртөг 1300 орчим төгрөг байна. Янз бүрийн шалтгаанууд бий. Зовлон яриад байвал, яриад л баймаар байна.

Цахилгаан эрчим хүчээ тодорхой хэмжээгээр нэмэгдүүлэхгүй бол одоо байгаа дулаанд холбогдсон айлууд нь холбогдоод, гэр хороололд байгаа айлуудыг гэр хороололдоо бай. Нэмэлт дулаан, цахилгаан эрчим хүчинд холбохгүй. Бусад салбаруудыг дэмжихгүй боомилно гэх шийдвэрийн өмнө ирчихээд байна. Тиймээс Эрчим хүчний зохицуулах хороо бүрэн эрхийнхээ хүрээнд ойрын өдрүүдэд Улаанбаатар хотын дулаан, улсын хэмжээнд эрчим хүчний тарифыг нэмэгдүүлэх талаар Эрчим хүчний үндэсний хороонд танилцуулга хийнэ гэв. 

---