УИХ-ын Боловсрол соёл шинжлэх ухаан спортын байнгын хорооны дэргэд боловсролын зээлтэй холбоотой асуудлыг хэлэлцэх ажлын хэсэг байгуулагджээ. АТГ-ын мөрдөн шалгах хэлтсээс Боловсролын зээлийн сангийн эргэн төлөлтийг тэглэсэн зургаан сайдын захирамжийг хууль бусаар гаргасан гэж үзсэн байна. Тодруулбал, Боловсролын зээлийн сангийн тэглэлтийг 2008 оноос хойш зургаан сайдын 17 тушаалаар 800 орчим суралцагчийн 87.6 тэрбум төгрөгийн зээлийг хууль бусаар тэглэсэн гэх танилцуулгыг байнгын хорооны хуралдаанд танилцуулжээ.

УИХ-ын гишүүн О.Батнайрамдал: 

-УИХ-ын Боловсрол соёл шинжлэх ухаан спортын байнгын хорооны хуралд Боловсролын сайд АТГ-аас хийсэн хяналт шалгалтын дүгнэлтийг танилцуулсан. Тус дүгнэлтээр Боловсролын зээлийн сангийн тэглэлтийг 2008 оноос хойш зургаан сайдын 17 тушаалаар 800 орчим суралцагчийн 87.6 тэрбум төгрөгийн зээлийг хууль бусаар тэглэжээ. Энэ нь хууль бус учраас эдгээрийг хүчингүй болгох ёстой гэсэн дүгнэлтийг 2024 оны есдүгээр сарын 30-ны өдөр гаргасан. Тус дүгнэлтийг хэрэгжүүлж, тухайн тэглэсэн этгээдүүдээс энэ мөнгийг гаргуулах нь зүйтэй гэж манай ажлын хэсгээс үзэж байгаа.

2011 оны долоодугаар сарын 09-ний Дээд боловсролын санхүүжилт, суралцагчийн нийгмийн баталгааны тухай хуулийн 8.8-д аливаа татвар төлөгчдийн мөнгөөр олгож байгаа суралцагчийн зээлийг чөлөөлөх, хөнгөлөх, хүчингүй болгох журмын УИХ тогтооно гэж заасан. Ийм журам гараагүй байгаа юм. Тэгэхээр энэ хууль бус тушаалыг хүчингүй болгох ёстой гэсэн байр суурьтай байна.

2024 оны есдүгээр сарын байдлаар боловсролын зээлийн санд нийтдээ 364 тэрбум төгрөгийн гадаад зээл авсан байгаа. Үүнээс 87.6 тэрбум төгрөгийн зээл хууль бусаар тэглэгдсэн бол эргэн төлөлт 8.8 тэрбум төгрөг байна. Энэ нь нийт зээлийн 2.5 хувь хүрэхгүй үр дүнтэй байна.

АТГ, прокурорын газраас хамтарсан ажлын хэсэг гарган боловсролын зээлийн эргэн төлөлтийг хийх ёстой гэдэг байр суурьтай байна гэв. 

---