Сүхбаатар дүүргийн ЗДТГ-ын даргын үүрэг гүйцэтгэгч Н.Одончимэгийг хахууль авч байх үйлдэл дээр нь уржигдар орой хууль АТГ-ынхан саатуулж шалгаж эхэллээ. Түүнийг шүүх, прокурорын зөвшөөрөлгүйгээр хойшлуулшгүйгээр баривчлаад буй бөгөөд үргэлжлүүлэн хорьж шалгах саналаа мөрдөх болон прокурорын байгууллагаас хараахан хүргүүлээгүй байгаа юм.

Баттай эх сурвалжуудаас авсан мэдээллээр 2020 оны арванхоёрдугаар сарын 16-нд нээсэн Сүхбаатар дүүргийн Нэгдсэн эмнэлгийн барилга барих ажлыг гүйцэтгэгчийг сонгон шалгаруулах СБДХААА/202001005 дугаартай тендерт оролцон шалгарсан аж ахуйн нэгжийн удирдлагаас энэ сарын 16-ны үдэш 55 сая төгрөгийн хахууль авч байжээ. Уг тендерт С.Гантөмөр, Б.Боролзойхүү хэмээх эцсийн өмчлөгч, гүйцэтгэх захиралтай “Ванхүү” ХХК шалгарсан юм билээ. Гэхдээ тус компани уг тендерт хамгийн бага үнэ санал болгож шалгараагүй, магадгүй эрх мэдэлтнүүд тухайн аж ахуйн нэгжийнхэнд давуу байдал олгосон байж болзошгүй аж.

Тодруулбал, дээрх тендерт “Цонбонтоосго” ХХК 15.6 тэрбумаар ажлыг гүйцэтгэнэ гэж санал болгосон ч хасагдсан бол “Ванхүү” ХХК 15.9 тэрбум гаруй төгрөгөөр эмнэлгийн барилга барих санал гаргаж тендерт шалгарсан нь ийм хардлага төрүүлж буй юм.

Сүхбаатар дүүргийн ЗДТГ-ын даргын үүрэг гүйцэтгэгч Н.Одончимэг тус компанийнхнаас 55 сая төгрөгийн хахууль авч байсан үйлдлийг хууль сахиулах байгууллагынхан хангалттай баримтжуулаад тогтохгүй, хойшлуулшгүй ажиллагааны хүрээнд нь гэр, ажлынх нь байранд нэгжлэг хийж, 400 гаруй сая төгрөг, их хэмжээний алтан болон үнэт эдлэлийг битүүмжлээд байна.

Н.Одончимэгийн хувьд 2013 оноос Сүхбаатар дүүргийн Худалдан авах ажиллагааны албанд мэргэжилтэн, 2017 оноос даргаар нь ажиллах болсон нэгэн. Тэрбээр “Ванхүү” ХХК-ийнхнаас гадна албан тушаал, эрх мэдлээ урвуулан ашиглаж “Интерконсалтинг констракшн” гэх компанид давуу байдал олгон хахууль авсан байж болзошгүй хэмээн шалгуулж буй аж.

---