УИХ-ын чуулган хуралдаанаар Төрөөс мөнгөний бодлогын талаар 2025 онд баримтлах үндсэн чиглэл батлах тухай хэлэлцэж байна. Энэ үеэр УИХ-ын зарим гишүүд нийгмийн даатгалын сан, эрүүл мэндийн даатгалын сангийн мөнгийг эрсдэлтэй нэр бүхий гурван банкнаас авах асуудлыг тодруулж байв. 

Монголбанкны ерөнхийлөгч Б.Лхагвасүрэн:

-Үндэсний хөрөнгө оруулалтын банк нь Нийгмийн даатгалын сан, Эрүүл мэндийн даатгалын санд үүсгээд байсан 66.6 тэрбум төгрөгийн төлбөрөө барагдуулж, өргүй болсон. Тодруулбал, 2019 онд тус банк Нийгмийн даатгалын санд 35.8 тэрбум, Эрүүл мэндийн даатгалын санд 30.8 тэрбум төгрөгийн хохирол учруулаад байсныг Монголбанкнаас хянагч тавин ажилласнаар барагдуулсан.

Харин Капитал банк татан буугдах үед Эрүүл мэндийн даатгалын сан, Нийгмийн даатгалын санд нийтдээ 240 тэрбум төгрөгийн өр үүссэн. Өнгөрсөн хугацаанд өр барагдуулах ажлыг зохион байгуулснаар Нийгмийн даатгалын сангийн 37.2 тэрбум, Эрүүл мэндийн даатгалын 58.8 тэрбум төгрөг нь төлөгдсөн. Түүнчлэн Нийгмийн даатгалын санд 67 тэрбум, Эрүүл мэндийн даатгалын санд 77 тэрбум төгрөг төлөх өртэй байна. Үүнийг барьцаа хөрөнгүүдийг борлуулах замаар шийдвэрлэх боломжтой гэж төв банкны зүгээс үзэж байна.

Капитал банкийг татан буулгаад барьцаа хөрөнгүүд нь прокурорын битүүмжид байсан. Энэ оноос битүүмжлэл суллагдсанаар барьцаа хөрөнгийг эргэлтэд оруулснаар үлдэгдэл авлагыг барагдуулна.

Мөн Чингис хаан банк Нийгмийн даатгалын сангийн 100 тэрбум төгрөг байршуулсан байснаас 7 тэрбум нь төлөгдөж 93 тэрбумын өр үлдсэн бол Эрүүл мэндийн даатгалын сангийн 30.9 тэрбум төгрөг төлөгдөөгүй хэвээр байгаа гэв. 

---