Эрүүл мэндийн даатгалын эрх зүйн орчин бүрдсэн ч салбарын удирдлагууд хэрэгжилт тал дээр муу ажиллаж байна. Энэ талаар ЭМД-ын үндэсний зөвлөлийн гишүүн Н.Одонгуагаас тодрууллаа. 

ЭМД-ын үндэсний зөвлөлийн гишүүн Н.Одонгуа:

-Монгол Улсын хүрээнд цаасан дээр бичигдсэн хууль эрх зүйн орчин түүнийг зохицуулах журмууд харьцангуй сайн. Гэтэл бид нар гүйцэтгэл дээрээ алдаад байдаг. Эмнэлгийн байгууллага мөртлөө төлөөлөн удирдах зөвлөлийг байгуулаагүй хуулийн хүрээнд 2015 онд Эрүүл мэндийн даатгалын газрыг бие даасан байгууллага болно гээд хуульдаа тусгасан боловч хэрэгжээгүй.

Үндэсний зөвлөлийн гишүүд нь өөрийнхөө харьяа техникийн хороо байгуулна гээд заасан, техникийн хороо нь өнөөдрийн гарч байгаа бүхий л журмуудад үнэлгээ хийгээд дараагийн сайжруулах, ийм дүгнэлт зөвлөмж өгдөг бүтэц нь байгуулагдаагүй төсвийн Сангийн яам нь хассан, нэг үгээр хэлбэл байгаа ч юм шиг, байхгүй ч юм шиг ийм эмх замбараагүй байдалтай байна.

Тухайн байгууллагыг удирдаж байгаа Эрүүл мэндийн сайд асан С.Энхболд хүртэл өөрөө авлигын хэрэгт шалгагдаж байна. Даатгалын ерөнхий газарт байсан тэр нэхэмжлэлээ хянадаг хэлтсийн дарга нь өөрөө дур мэдэж аль байгууллагатай нэхэмжлэлийн хасагдал хийх үү, алинд нь хэдэн төгрөг олгох уу гэдэг хувийн шинжтэй шийдвэрүүдийг гаргасныхаа төлөө өнөөдөр АТГ-т шалгагдаж байна. Үе үеийн сайдууд төрийн нарийн бичгийн дарга нь ингээд гэмт хэргийн шинж чанартай үйлдэл үзүүлээд яваад байдаг. Тэгэхээр энэ бол засаглалын хямрал, хариуцлагагүй байдалтай бид нар эргээд хариуцлага тооцож чадахгүй байгаа гэв. 

---