Зөрчлийн хуулиар эмийн сангуудад хүлээлгэх хариуцлага өндөрссөнтэй холбоотойгоор зарим эмийн сан эмийг жороор олгож байгаа гэх мэдээлэл байна. Эмнэлгийн хэрэгсэл буюу тариа, зүү, дуслын систем зэргийг ямар нэг жороор олгох зохицуулалт байхгүй. Энэ талаар салбар яамнаас ямар нэг тогтоол шийдвэр гаргаагүй гэж Эрүүл мэндийн сайд Т.Мөнхсайхан хэлж байна. 

Эрүүл мэндийн сайд Т.Мөнхсайхан:

-Эм жорын дагуу хууль дүрмийнхээ дагуу олгогдох ёстой. Жортой эм дотроо хоёр янз байдаг. Мансууруулах сэтгэцэд нөлөөтэй эмийг тусгай жороор олгоно. Энд эмчийн тамга, эмнэлгийн дарга, ерөнхий эмчийн гарын үсэгтэй бичгээр олгогдоно. Харин энгийн жортой эмийг эмчийн гарын үсгийн тамгатай олгогдоно. Түүнчлэн жоргүй олгогддог эм гэж байгаа.

Тухайн эмийг үйлдвэрлэгчид энэ эмийг жороор олгоно гэж бас зааж өгсөн байдаг. Үүний дагуу бүртгэгдээд ороод ирсэн тохиолдолд Эмийн үнийн зөвлөл хуралдаад үйлдвэрлэсний дагуу жороор олгоно, олгохгүй гэдэг зохицуулалтыг хийдэг.

Харин эмнэлгийн хэрэгсэл буюу тариа, зүү, дуслын систем зэргийг ямар нэг жороор олгох зохицуулалт байхгүй. Өвчин намдаах эмийг жоргүй олгох асуудлыг нэг талд нь гаргаж, бүгдийг нь жоргүй олгодог болгох зохицуулалтыг бид хийх шаардлагатай.

Жоргүй олгох эмийг жортой олгоно гэдэг асуудал нь энэ сарын 10-ны өдрөөс зарим эмийн сангуудаас эхэлсэн. Зөрчлийн тухай хуульд зарим нэг өөрчлөлтүүд орсон байгаа. Хууль хэрэгжиж эхэлснээрээ жортой эмийг жоргүй олгосон тохиолдолд торгох торгууль нь өндөр болсон гэх тайлбарыг өгч байгаа. Түүнээс энэ асуудалтай холбоотойгоор ямар нэг сайдын тушаал шийдвэр гараагүй.

Эмийн сангуудад энэ талаарх мэдээллийг өгөөд явж байна гэв. 

---