УИХ-ын дарга Д.Амарбаясгалан Шүүхийн ерөнхий зөвлөлд ажиллаж байна. Тэрээр дараах байр суурийг илэрхийллээ. 

УИХ-ын дарга Д.Амарбаясгалан: 

Шүүхийн хараат бус байх гэдэг зүйл дээр онцгой анхаарч ажиллах ёстой. Хараат бус байдлыг бүрдүүлж өгье гэдэг нь төсөв санхүү, орон байрны хувьд, хуулийн хэрэгжилт, шүүгч шийдвэр гаргахдаа хүртэл бие даасан байх эсэхийг бүрдүүлж өгөх нь өөрөө хамгийн чухал асуудал болчхоод байгаа юм.

ШЕЗ-ийн дарга сая хэлэхдээ нэг ч стандартын шаардлага нийцсэн шүүхийн байр алга гэж. Бид шүүхийг шударга ажлаарай гэж шахдаг ч нөгөө талдаа ажиллах боломжийг бүрдүүлж өгч чадаагүй байна. Тиймээс бодитой үр дүн хүлээх боломжгүй.

Нөгөө талдаа шүүхийн төсвийн асуудал хараат бус байх ёстой. Шүүх УИХ, Засгийн газарт хүсэлт тавьж байж төсвөө батлуулж, үйл ажиллагаа явуулдаг. Сар болгон төсөвт өөрчлөлт орж буй асуудалд Сангийн яамнаас зөвшөөрөл авч, асуудал шийдвэрлэж байгаа нь буруу байна. Хууль засаглах гээд байна уу, хүн засаглах гээд байна уу, байгууллага засаглах гээд байна уу гэдгийн ялгааг эндээс олж харах хэрэгтэй болчхоод байна. Гэтэл УИХ хууль засагладаг байдлыг бий болгохыг хатуу тогтъё. Тэр дундаа хүний төлөө, хүн төвтэй бодлого эн тэргүүнд байя гэж байгаа юм.

Зарим шүүгчийн шийдвэрт гадны нөлөөлөл орлоо гэдэг хардалт байнга явж байдаг. Яг ийм бодит нөхцөл байдал байна уу гэдгийг өнөөдөр ярих ёстой. Монгол Улсын иргэн бүр шударга шүүхээс шүүлгэх тийм боломжийг л бүрдүүлэх ёстой.

ШЕЗ-ийн даргыг нэг, нэг жилээр ротац хийж, ээлжилж удирддаг. Энэ бол нэг дарга олон жил удирдахгүй байх талаасаа зөв юм.

---