Улсын зээлжих зэрэглэлийн талаарх ерөнхий танилцуулга болон Фитч агентлаг 2024 оны Монгол Улсын зээлжих зэрэглэлийн үнэлгээг “В+/Тогтвортой” болгон нэмэгдүүлсэн талаар Сангийн сайд Б.Жавхлан Засгийн газрын гишүүдэд танилцуулжээ.

Сангийн сайд Б.Жавхлан: 

-Олон улсын зээлжих зэрэглэлийг тогтоодог гурван агентлаг байдаг. Фитч (Fitch Ratings), Мүүдис (Moody’s Investors Service), Стандарт энд Пүүрс (S&P Global Ratings) зэрэг. Фитч агентлаг өнгөрсөн долоо хоногт тайлангаа баталж, энэ сарын 19-ний өдөр олон улсын мэдээллийн хэрэгслээр зарласан. Энэ тайланд зээлжих зэрэглэлийг ямар шалтгаанаар ахиулж буйгаа маш дэлгэрэнгүй дурдсан байна.

Нэгдүгээрт, Засгийн газар өрийн удирдлагын менежмент стратегиа сайн барьж ирсэн тул өрийн дарамт эрс буурсан.

Хоёрдугаарт, Монгол Улсын Засгийн газар улс төрийн тогтвортой байдал, сонгуулийн үр дүн,

Гуравдугаарт, Санхүү, төсвийн сахилга бат нь уул уурхайн салбарын өсөлттэй уялдсан,

Дөрөвдүгээрт, Гадаад валютын улсын нөөц сүүлийн дөрвөн жилийн хугацаанд тогтвортой нэмэгдсэн байна гэдгийг дурджээ.

Мөн үүн дээр хоёр зүйлийг нэмж дурдсан. Өнгөрсөн наймдугаар сард Засгийн газар төсвийн тодотгол өргөн барихдаа төсвийн дүрэмдээ нэмэлт өөрчлөлт оруулсан. Монгол Улс зээлийн үндсэн өрөө жил бүр тогтмол төлж явна гэдгийг хуульчилсан.

Монгол Улсын зээлжих зэрэглэлийг авч үзвэл, бид 2010 онд анх Чингис бонд гарахтай зэрэгцэн Монгол Улсын зээлжих зэрэглэлийг анх тогтоолгосон. Фитч агентлагийн хувьд Монгол Улсын зээлжих зэрэглэлд 2011 онд хамгийн дээд тал нь B+ тогтвортой үнэлгээг өгч байсан. 2013 оноос гурван агентлагийн зээлжих зэрэглэлүүд бүгд огцом унасан. 

Хүнд сорилттой он жилүүдэд Засгийн газрын хэрэгжүүлсэн санхүү, төсвийн сахилга бат, өрийн удирдлагын оновчтой бодлогыг хэрэгжүүлсний үр дүнд зээлжих зэрэглэл бууруулахгүйгээр “В” зэрэглэлд тогтвортой хадгалж ирсэн. Улмаар сүүлийн арван жилд анх удаа зээлжих зэрэглэлээ сайжруулж “В+/Тогтвортой” түвшинд хүргэж чадлаа гэв. 

---