Улаанбаатар хотын бодлогыг 2020-2024 онд тодорхойлсон Нийслэлийн Иргэдийн Төлөөлөгчдийн Хурал /НИТХ/ өчигдөр хаалтын хуралдаанаа хийж, бүрэн эрхийн хугацаагаа үндсэндээ дуусгавар болгов.

Эрх баригч хүчнийхэн өнгөрсөн дөрвөн жил цар тахал, өвчин зовлон гээд хүнд бэрхшээлийн ард гарч, амжилттай ажилласан хэмжээн өөрсдийгөө магтсан үгнүүд урсгав. Харин сөрөг хүчний нийслэлийн намын дарга, НИТХ-ын төлөөлөгч Т.Батцогт хатуухан шүүмжлэл хэлсэн юм. Тэрээр эрх баригчдыг ажил хийх гэхээсээ илүүтэй албан тушаалтай зууралдсан хэмээн онцлов.

НИТХ-ын төлөөлөгч Т.Батцогт: 

-НИТХ-аас сонгогддог хотын гүйцэтгэх засаглал болох нийслэлийн Засаг даргыг хоёр удаа сольж, Монгол Улсын хүн амын 60-аас илүү хувь нь оршин суудаг Улаанбаатар хотын асуудал сайд, гишүүдийн сэлгээний, ашиг сонирхлын албан тушаал болон хувирав. Нийслэлийн төсөвт жилдээ 2, 3 удаа тодотгол хийдэг болов. Энэ нь засаглалын, төсвийн тогтворгүй байдлыг бий болгож, төрийн бодлогын залгамж халаа алдагдаж, хотын хөгжлөөс хойш татсан гэж үзэж байна. Өнгөрсөн хугацаанд Нутгийн өөрөө удирдах ёсны бүрэн чадамж, НИТХ-ын төлөөлөгчдийн эрх зүйн чадамжинд эрх баригч нам халдсан ёс зүйгүй шийдвэрүүдийг удаа дараа гаргаж, Нийслэлчүүдээсээ сонгогдсон НИТХ-ын төлөөлөгчдөөс сонгогдох, батламжлагдах хуульчлалтай засаглалын тогтолцоог эвдсэн буруу жишгийн эрх баригч нам бий болгосныг Нийслэлчүүд бид мартах ёсгүй гэж үзэж байна” гэж байлаа.

Мөн тэрээр “Нийслэлчүүд бид 2023 оны арванхоёрдугаар сарын Сибирийн хүйтэн агаар Улаанбаатар хотыг дайрч өнгөрүүлсэн тэсгэм хүйтэн үед авто машиныг тэгш, сондгойгоор зорчуулах шийдвэрийг хотын удирдлага гаргасан. Энэ бол манай хотын бодлого, шийдвэр нэгэнт хүнээ, иргэнээ бодохоо больсныг илтгэх бодит үйлдэл мөн тул би өнөөдөр энэ индэр дээрээс эргүүлэн сануулахыг хүслээ.

Цаашид нутгийн өөрөө удирдах ёсны чадамж илүү бэхжиж, нийслэлчүүдээ бүрэн төлөөлөх, дуу хоолой нь байж чадах, хотын хөгжлөө хорин жилээр урагшлуулан хүн, хүүхэд төвтэй бодлого хэрэгжүүлдэг, хүн бүр, хүүхэд бүр, гэр бүл  бүр эрүүл аюулгүй орчинд амьдардаг, эрх чөлөөтэй, эрүүл бие бялдартай, эдийн засгийн чадавхитай иргэдтэй нийгмийн бий болгож чадах иргэдийн төлөөллийн байгуулага бүрдээсэй, засаглал байгуулаасай гэж чин сэтгэлээсээ хүсэж байна гэв. 

---