Нийслэлийн Иргэдийн Төлөөлөгчдийн Хурлын хүндэтгэлийн хуралдаан болж байна. Энэ үеэр БЗД-ийн төлөөлөгч Нийслэлийн Ардчилсан намын дарга Т.Батцогтоос тодрууллаа. 

Нийслэлийн Ардчилсан намын дарга Т.Батцогт:

-Нутгийн өөрөө удирдах байгууллага гэдэг бол маш чухал. Иргэдийн өдөр тутмын амьдрал ахуй, орчинд тулгамдаж буй асуудлыг татвар төлөгчдийн мөнгөөр шийдвэрлэдэг. Орон нутгийн сонгууль аравдугаар сарын 11-ний өдөр болно. Иргэдийн төлөөлөгчдийн дөрвөн жилийн сонгуульт хугацаа өнөөдөр дуусаж, НИТХ отгон хурлаа хийж байна.

Миний хувьд НИТХ-д БЗД-ийг төлөөлж ажиллалаа. Нийслэлийн иргэдийн хурал 2021 онд эрх зүйн шинэчлэл хийсэн. Нутгийн өөрөө удирдах байгууллагын бүрэн эрхэд халдсан хэд хэдэн хуулиуд байсан тул шүүмжлэлтэй хандаж байгаа.

Өнгөрсөн жилүүдтэй харьцуулахад энэ удаагийн ИТХ өндөр төсөвтэй байлаа. Жил бүр тогтмол төсөв нэмэгдэж байна. 3,2 их наяд төгрөгийг нийслэлчүүдийн өдөр тутмын амьдралд бодит хэрэгцээнд эрэмбэлж зарцуулж чадаж байна уу гэдэгт асуудал байна. Түгжрэлийг бууруулна гэж 2022 онд 420 тэрбум, 2023 онд 470 тэрбум төгрөг баталж өгсөн. Өнөөдөр нэг их наяд төгрөгөөр Улаанбаатарчуудын түгжрэлийн асуудлыг бүрэн шийдвэрлэж чадсан уу гэх зэрэг асуудлыг бодитой ярих нь зүйтэй гэлээ.

---