Нийслэлийн Иргэдийн Төлөөлөгчдийн Хурлын хүндэтгэлийн хуралдаан болж байна. НИТХ-ын төлөөлөгч М.Говьсайханаас өнгөрсөн дөрвөн жилийн хугацаанд хийж хэрэгжүүлсэн ажлын талаар мэдээлэл авлаа.

НИТХ-ын төлөөлөгч М.Говьсайхан: 

-Өнгөрсөн дөрвөн жилийн хугацаанд нийслэл хотын удирдлагууд томоохон шийдвэрийг гаргасан он жилүүд байлаа. Нийслэл хотын эрх зүйн байдлын тухай хууль батлагдан гарсан. Энэ нь нийслэл Улаанбаатар хотын бүтэц, зохион байгуулалтын үндэслэл, хөгжлийн бодлого, цаашид хэрхэн хөгжих талаарх зорилтуудаа тодорхойлж өгсөн. Энэ хүрээнд Улаанбаатар хот томоохон төсөл хөтөлбөрүүдээ бие даан санхүүжүүлэх боломжууд нээгдэж гадаад, дотоод бонд гаргах боломжтой болж байна.

Мөн Улаанбаатар хотын түгжрэлийг бууруулах, гэр хорооллыг орон сууцжуулах тухай хууль батлагдсан. Тус хуулиар Улаанбаатар хотод тулгамдаад байсан газар чөлөөлөлтийн харилцаа, дэд бүтцийн асуудал зэргийг хууль эрхзүйн хүрээнд шийдвэрлэж өгсөн.

Энэхүү хуулийн хүрээнд нийтдээ зургаан дэд төв байгуулна. Үүнийгээ түшиглэж орон сууцжуулах төсөл хөтөлбөр хэрэгжүүлнэ. Сэлбэ дэд төвийн ажил амжилттай эхлээд газар чөлөөлөлтийн ажил үргэлжилж байна. Гэр хорооллыг орон сууцжуулах ажил өнгөрсөн арав гаруй жил яригдсан. Гэсэн ч хэрэгжилт нь хангалтгүй байсан.

Улаанбаатар хотод түгжрэл, агаарын бохирдол, иргэдийг орон сууцжуулах асуудал нэн тулгамдсан асуудал. НИТХ-ын сонгууль болно. Гэхдээ төрийн залгамж халаа, бодлого шийдвэр үргэлжлээд явах ёстой. Өнгөрсөн дөрвөн жилийн хугацаанд хууль эрх зүйн асуудал бүрэн шийдэгдсэн. Иймд томоохон төсөл хөтөлбөрүүд үргэлжлээд амжилттай хэрэгжих ёстой гэв. 

---