Өнөө шөнө буюу есдүгээр сарын 20-21-нд шилжих шөнө Дундговь, Говьсүмбэр аймгуудын нутгаар шөнөдөө хөрсөн дээр 0...-5 градус хүрч цочир хүйтэрнэ.

Газар тариалангийн бүс нутгаар хүйтэн хонох тул хадланчид, тариаланчид тариа ногоогоо хамгаалах арга хэмжээг авахыг анхааруулав.

Өнгөрсөн хоногт баруун аймгуудын нутгийн зүүн, говь болон төвийн аймгуудын ихэнх нутаг, зүүн аймгуудын нутгийн өмнөд хэсгээр 0.0-23.0 мм бороо, нойтон цас, цас орсон байна.

Үүнээс хоногийн нийлбэрээр хамгийн их нь Өмнөговийн Даланзадгад 23.0 мм, Дорноговийн Замын Үүд 16.0 мм, Өмнөговийн Булган 15.0 мм, Дорноговийн Хөвсгөл, Өмнөговийн Ноён, Дундговийн Луус 12.0 мм, Дорноговийн Улаанбадрах, Өмнөговийн Хүрмэн, Дундговийн Сайнцагаан 10.8-11.0 мм, бусад нутгаар 0.0-10.0 мм бороо, нойтон цас, цас ороод байгаа юм байна.

---