УИХ-ын дарга Д.Амарбаясгалан ойрын өдрүүдэд УИХ-ын харьяа байгууллагуудаараа ажиллаж байгаа бөгөөд өнөөдөр Үндэсний статистикийн хороонд ажиллалаа.

УИХ-ын дарга Д.Амарбаясгалан:

-Статистик судалгаа мэдээлэлгүйгээр аливаа түвшинд шийдвэр гаргана гэдэг нүдээ боогоод харанхуйд алхаж буйтай агаар нэг. Харин төр энэхүү мэдээллийг хэрхэн ашиглаж чадаж байна вэ гэдэг нь чухал.

Статистик мэдээллийг ашиглаж шийдвэр гаргаж, олон нийт иргэд аж ахуй нэгжид тулгамдсан асуудлыг төрийн үйл ажиллагаа хэвийн тогтвортой явах нөхцөлийг бүрдүүлэхэд төр засаг төрийн удирдлагууд өөрсдөө анхаарч байна уу гэдэг асуудал бас энд яригдана.

УИХ Үндсэн хуулиар олгогдсон чиг үүргийнхээ дагуу гүйцэтгэх засаглалд тодорхой хяналт шалгалтын чигийг баримталж ажилладаг. Төрийн бодлого шийдвэр нь тогтвортой байна уу? Засгийн газрыг бодлого нь хуулийн хэрэгжилттэйгээ нийцэж уялдаж гэх мэт олон зүйл дээр хяналтын чиг үүргийг гүйцэтгэдэг. Үүний нэг том чиглэлийг барьж ажилладаг нь статистикийн байгууллага. Тэр ч утгаараа УИХ-ынхаа харьяанд энэ байгууллага үйл ажиллагаагаа явуулдаг. Тооцоо судалгааг хийж, түүнээс гарсан үр дүнг тооцлоо. Санал, зөвлөмж хүргүүллээ. Тэр бодлогыг авч хэрэгжүүлж ажиллаж байгаа эсэх дээр тодорхой хэмжээний үнэлэлт дүгнэлтийг өгдөг байх шаардлагатай гэж үзэж байна.

Шийдвэр гаргагчдын хамгийн сүүлийн үеийн тоон мэдээллээр хангана гэдэг нь статистикийн байгууллагын хүчин чадлын асуудал. Сүүлийн жилүүдэд цахимжсан, дэвшилтэд технологиудыг статистикийн үйл ажиллагаанд нэвтрүүлж байгаа байдал нь мэдээлэл цуглуулах арга хэлбэр нь хялбар, дата анализыг богино хугацаанд дүгнэж чаддаг болох зэрэг олон асуудал өөрчлөгдсөн байна.

Статистикийн байгууллагын судалсан судалгаагаар иргэн аж ахуй нэгжүүдэд тулгамдаад байгаа асуудал энэ байна. Шийдвэрлэвэл зохих асуудал нь энэ байна гэх мэтчилэн бодит зүйлсийг гаргаж ирэх нь чухал. Тухайлбал, сар бүр бид үнийн өсөлтийн асуудлыг хөнддөг. Ялангуяа дотоодын хүнсний бүтээгдэхүүн мах, сүү, гурилан бүтээгдэхүүний үнийн өсөлт байна. Өсөж байгааг нь мэдээлж байгаа ч үүнийг хэрхэн зогсоох вэ гэдгийг бодитоор дүгнэлт гаргаж Засгийн газар, УИХ-ын түвшинд хүргэж чадаж байна уу гэдэг л чухал байна гэв. 

---