УИХ-ын Ерөнхий нарийн бичгийн дарга Б.Баасандорж нь УИХ-ын гишүүн М.Нарантуяа-Нараг хэд хэдэн үйлдлээр ёс зүйн зөрчил гаргасан гэж үзэж, УИХ-ын Ёс зүй, дэгийн байнгын хорооны дарга Б.Баярбаатарт хандсан.

Тодруулбал, УИХ-ын гишүүн М.Нарантуяа-Нара нь олон нийтийн сүлжээгээр хэдэн хэдэн удаа лайв хийж, бараа бүтээгдэхүүн сурталчилсан, мөн УИХ-ын ээлжит бус чуулган хуралдаж буй өдрүүдэд УИХ-ын даргаас албан ёсны зөвшөөрөл хүсэлгүйгээр гадаадад зорчиж, чуулганы хуралдаан тасалсан гэсэн үндэслэлээр ёс зүйн хариуцлага тооцох ёстой гэж үзсэн юм.

Энэ асуудлыг УИХ-ын Ёс зүй, дэгийн байнгын хороо өчигдөр хэлэлцэж, ажлын хэсэг гарган ажлуулсан. Ажлын хэсэг эргэж байнгын хороонд дүгнэлтээ танилцуулсан.

УИХ-ын Ёс зүй, дэгийн байнгын хороо УИХ-ын гишүүн М.Нарантуяа-Нараг ёс зүйн зөрчил гаргасан гэж үзсэн байна. Байнгын хорооны гишүүдийн олонхийн саналаар сануулах арга хэмжээ авахаар болжээ. УИХ-ын гишүүн М.Нарантуяа-Нарагийн хувьд ёс зүйн зөрчил гаргаснаа хүлээн зөвшөөрч буй юм.

 

---