УИХ-ын Ерөнхий нарийн бичгийн дарга Б.Баасандорж нь УИХ-ын гишүүн М.Нарантуяагийн асуудлаар УИХ-ын Ёс зүй, дэгийн байнгын хорооны дарга Б.Баярбаатарт ханджээ.

Учир нь УИХ-ын гишүүн М.Нарантуяа /Нара/ нь олон нийтийн сүлжээгээр хэдэн хэдэн удаа лайв хийж, бараа бүтээгдэхүүн сурталчилсан, мөн УИХ-ын ээлжит бус чуулган хуралдаж буй өдрүүдэд УИХ-ын даргаас албан ёсны зөвшөөрөл хүсэлгүйгээр зорчсон гэсэн хоёр үндэслэлээр хандсан байна.

"Монгол Улсын Их хурлын гишүүн ёс зүйн дүрэм"-ийн 3.3-т "Гишүүн өвчтэй, чөлөөтэй, албан томилолтоор ажиллахаас бусад тохиолдолд чуулганы нэгдсэн, байнгын, дэд, түр хорооны хуралдаанд товлосон хугацаанд ирж оролцох үүрэгтэй" гэж заасан байдаг. Гэвч М.Нарантуяа гишүүн Ёс зүйн дүрмийн тодорхой заалтуудыг зөрчжээ.

Иймд "Монгол Улсын Их хурлын гишүүний ёс зүйн дүрэм"-ийн 10.1.4, 10.2-т заасны дагуу холбогдох арга хэмжээг авахыг хүссэн байна. 

 

---