Монгол Улсын Ерөнхий сайд Л.Оюун-Эрдэнийн урилгаар Япон Улсын Ерөнхий сайд Ф.Кишида энэ сарын 11, 12-ны өдрүүдэд Монгол Улсад албан ёсны айлчлал хийхээр төлөвлөөд байсан ч цуцлагджээ.

Учир нь Японы Цаг уурын агентлаг Кьюшү арлыг доргиосон 7.1 магнитудын хүчтэй газар хөдлөлтийн дараа өнгөрсөн пүрэв гаригт анх удаа мега газар хөдлөлтөөс сэрэмжлүүлсэн тусгай зөвлөмж гаргасан юм. Түүнчлэн Номхон далайн эрэг дагуух Нанкай хотгорын орчимд хүчтэй газар хөдлөлт болж болзошгүй байгаа талаар анхааруулсан. Иймд Япон улсын Ерөнхий сайд Ф.Кишида газар хөдлөлтийн аюулаас сэргийлэхэд бэлэн байж,  Ази болон бусад орнуудад хийх айлчлалаа цуцална гэдгээ мэдэгдсэн талаар Японы хэвлэлүүд мэдээлжээ.

Манай Засгийн газрын Хэвлэл мэдээллийн албанаас  ч “Япон Улсын Ерөнхий сайд Ф.Кишидагийн айлчлал тус улсад үүсээд буй нөхцөл байдлаас шалтгаалан цуцлагдсан. Айлчлалын тов дахин гарахаар мэдэгдэнэ” гэлээ.

---