Канад улсын Засгийн газар АНУ-ын нэрийн өмнөөс Хятадын технологийн компани “Huawei”-н санхүүгийн албаны гүйцэтгэх захирал Мэн Ванзоу-г баривчлан саатуулсан талаар хэвлэлүүд мэдээлжээ. Канадын шүүх байгууллагаас гүйцэтгэх захирлыг Ванкуверт 12 дугаар сарын нэгний өдөр саатуулсан гэжээ.

Мэн Ванзоу буюу Кэти Мэн нь тус компанийг үүсгэн байгуулагч Рэн Зэнфэйн охин юм. Ванкувер хотоор дамжин нисэх гэж байхад нь саатуулсан байна.

“Huawei” компани энэ талаар “дэлгэрэнгүй мэдээлэл аваагүй, ямартай ч хатагтай Мэн алдаа гаргаж буруу зүйл хийгээгүй” гэсэн тайлбарыг өгчээ. АНУ-ын Засгийн газар Кэти Мэнийг Канадын Засгийн газраас шилжүүлэн авах гэж байна.

Маргааш буюу баасан гарагт түүнийг батлан даалтанд суллах эсэхийг Канадын шүүх байгууллага шийднэ гэжээ.  

Америкийн зүгээс Хятадын тэргүүлэх технологийн компани “Huawei”-г Ираны эсрэг тавьсан хориг арга хэмжээг зөрчсөн эсэхийг мөрдөн шалгаж байсан. Мөн удаа дараа тус компани Нэгдсэн улсын аюулгүй байдалд аюул заналхийлж байна гэж буруутгасаар ирсэн. Компанийн технологийг ашиглаж Бээжин Вашингтоныг тагнаж байж болзошгүй хэмээн сэрддэг.

Гэвч “Huawei” НҮБ, Европын Холбоо, АНУ-ын тогтоосон хууль дүрэм, хориг цаазыг огт зөрчилгүй даган мөрдөж байгаа гэсэн байр сууриа илэрхийлсэн. Канад дахь БНХАУ-ын Элчин сайдын амнаас “АНУ-ын хүсэлтээр Канадын Засгийн газар Хятадын иргэнийг баривчилсан байна. Америк, Канад улсууд нэн даруй Мэн Ванзоугийн талаар эндүү ташаа таамгаа тодруулж, эрх чөлөөг нь эргүүлэн олгохыг уриалж байна” гэж мэдэгджээ.

“Huawei” компанийн 5G технологийг зарим орнууд хэрэглэхээс татгалзсан. Учир нь уг сүлжээ үндэсний цахим аюулгүй байдалд халгаатай хэмээн сэрэмжилж байгаа юм.

 

Эх сурвалж: www.bbc.com

---