Завхан аймгийн Зайгал багийн “Хосын голын Ар хуш” гэдэг газар ойн түймэр гарсан тухай дуудлагыг онцгой байдлын байгууллага өчигдөр 12:00 цагт хүлээн авчээ.

Тус аймгийн Онцгой байдлын газрын Тэс сум дахь Гал түймэр унтраах, аврах 57 дугаар ангийн алба хаагчид, Хилийн цэргийн 0277 дугаар ангийн алба хаагчидтай хамтран 145 км замыг туулан 18:38 цагт очиж унтраах ажиллагааг зохион байгуулсан байна.

Алба хаагчид 2 цаг 52 минут ажиллан 21:30 цагт ойн түймрийг бүрэн унтраасан байна. Урьдчилсан байдлаар ойн түймэрт 0.08 га орчим талбай өртөж шатжээ.

---