УИХ-ын гишүүн Г.Ганболд: Парламент сонсголууд зохион байгуулж, хууль бус үйл ажиллагаанд хяналт тавих талаасаа сайн ажилласан.

УИХ-ын гишүүн Г.Ганболд:

-2020-2024 оны УИХ хамгийн олон хууль тогтоомжийг баталсан. Өмнөх гучин жилийн хугацаан дахь парламенттай харьцуулахад ажил хэрэгч, ирц өндөртэй үлгэр жишээ байсан гэж бодож байна.

УИХ-ын хяналт шалгалтын хуулийг баталсан нь энэ парламент баталсан нь хамгийн гол хэрэгжүүлсэн ажил. Тус хууль батлагдсанаар нийгмийг бухимдуулсан аливаа асуудалд түр хороо байгуулж, хяналтын ерөнхий болон нотлох баримтыг шинжлэн судлах сонсголыг зохион байгууллаа. Энэ нь нийгэм цэгцрэх үйл ажиллагааны эхлэл болсон. Үүнийгээ дагаад төр, нам цэгцрэхээс гадна төрийн дээр гараад суучихсан олигархуудыг цэгцлэх ажлыг төр өөрөө хийж байна. 

Түүнчлэн улс орны эдийн засаг ирээдүйд асар чухал хууль баталж чадлаа гэж үзэж байна. Тухайлбал, Эрүүгийн хуулийн асар том өөрчлөлтүүд, төрөөс хулгай хийсэн этгээдийг хүндээр шийтгэдэг боллоо.

Энэ парламент Үндсэн хуулийн өөрчлөлтийг хийж чадсан. Сонгуулийн холимог тогтолцоотой боллоо. Бүсчилсэн хэлбэрээр хөгжих томоохон алхмыг тавьж чадлаа.

Энэ удаагийн парламент өмнө нь гарч байгаагүй шийдвэрийг гаргасан. Хулгайтай тэмцэж, улсын төсөв нэмэгдсэний үр дүнд иргэдийнхээ цалинг нэмэгдүүлж, тэтгэвэр тэтгэмжийг нэмэгдүүлж чадсан. Эдийн засагт томоохон үр ашиг үзүүлж байна.

Малчдыг дэмжих томоохон шийдвэрийг энэ парламент гаргалаа гэв.

---