Монгол Улсын Засгийн газраас “Шинэ хоршоо” хөдөлгөөний хүрээнд хэрэгжүүлж буй “Шинэ хоршоо- Чинээлэг малчин” арга хэмжээний санхүүжилтийг энэ сарын эхээр шийдвэрлэсэн билээ. Таван жилийн хугацаанд хэрэгжүүлэх “Шинэ хоршоо- Чинээлэг малчин” арга хэмжээний 5 их наяд төгрөгийн зээлийн санхүүжилтийг Монголбанк болон арилжааны 7 банк хоршоогоор дамжуулан малчдад 6 хувийн хүүтэй олгох юм.

“Шинэ хоршоо” хөдөлгөөн нь мал аж ахуйн салбарын нэмүү өртөг шингэсэн бүтээгдэхүүн үйлдвэрлэлийг нэмэгдүүлэх, малын гаралтай түүхий эд, бүтээгдэхүүний мөнгөн урсгалыг тогтмолжуулах, байгалийн бэрхшээлийг хамтын хүчээр хохирол багатай даван туулах улмаар мал аж ахуйн салбар ба малчдын ажил амьдралыг шинэ шатанд гаргахад чиглэгдсэн урт хугацааны бодлогын хөтөлбөр юм.

Хөтөлбөр өнөөдөр амьдрал дээр хэрэгжиж, Завхан аймгийн Тосонцэнгэл сумын Идэр багийн “Гурван толгодын шим” хоршоо хөрөнгө оруулалтын зээлээ авсан анхны хоршоо боллоо.

Тус хоршоо 2024 оны 5-р сард 13 гишүүнтэйгээр байгуулагджээ. “Гурван толгодын шим” хоршоо нь сүүний үнээ, 10 га талбайн услалтын систем, хадлан тэжээл бэлтгэх трактор тоног төхөөрөмж зэргийг цогцоор нь худалдан авах төсөл бичсэн байна. Мөн ногоон тэжээл тариалах, үрийн будаа худалдан авах зэрэгт санхүүжилтээ зарцуулна гэж төлөвлөжээ. Хоршооны гишүүд өөрсдийн мал хөрөнгөө барьцаалсан байна.

Ийнхүү Тосонцэнгэл сумын “Гурван толгодын шим” хоршоо 120 сая төгрөгийн зээл авах гэрээгээ Төрийн банктай байгууллаа.

”Шинэ хоршоо” хөдөлгөөний хүрээнд Зээлийн батлан даалтын хорооны 2024 оны 05-р сарын 14-ний өдрийн хурлаар хамгийн эхний зээлд Увс аймгийн “Баян шатат хоршоо”, Хэнтий аймгийн Норовлин сумын “Эвт сүргийн шим” хоршооны гишүүн малчны зээлд батлан даалт гаргалаа.

---