УИХ-ын 2024 оны сонгуульд оролцох улс төрийн намууд намын жагсаалтаар 48 хүнийг нэр дэвшүүлэх хуулийн зохицуулалттай. МАН, АН-ын удирдлагууд эмч, багш, инженер, эрдэмтэн судлаач, хөгжлийн бэрхшээлтэй иргэдийг намын жагсаалтаар нэр дэвшүүлэхээ эртнээс мэдэгдсэн.

Иймдээ ч намуудын дарга нараас бусад нам, улс төрийн өндөр дээд албан тушаалтнууд тойрогт нэр дэвших товтой байна. МАН-ын хувьд, УИХ-ын дарга Г.Занданшатар, МАН-ын бүлгийн дарга Д.Тогтохсүрэн нарыг тойрогт нэр дэвшихийг намын удирдлагууд нь чиглэл болгосон аж. Иймдээ ч дээрх хоёр эрхэм УИХ-ын I дүгээр тойрог буюу Архангай, Өвөрхангай, Баянхонгорт ажиллаж, уулзалтууд зохион байгуулж буй юм.

Гэхдээ УИХ-ын дарга Г.Занданшатар, МАН-ын бүлгийн дарга Д.Тогтохсүрэн хоёрын аль нэг нь намын жагсаалтад орох магадлал өндөр байгаа аж.

Сонгуулийн I дүгээр тойрогт МАН-аас нэр дэвших хүсэлтээ намынхаа Удирдах зөвлөлд 13 хүн өгчээ. Тодруулбал, УИХ-ын дарга Г.Занданшадар, УИХ дахь МАН-ын бүлгийн дарга Д.Тогтохсүрэн, УИХ-ын гишүүн Г.Тэмүүлэн, Г.Ганболд, С.Чинзориг, Гадаад харилцааны сайд Б.Батцэцэг, Батлан хамгаалахын сайд Г.Сайханбаяр, Ерөнхийлөгчийн зөвлөх Б.Даваадалай, Эрчим хүчний дэд сайд М.Баярмагнай, Архангай аймгийн Засаг дарга Б.Цэрэннадмид, УИХ-ын МАН-ын бүлгийн Ажлын албаны дарга С.Далхаасүрэн, Эрүүл мэндийн сайд асан А.Цогцэцэг, МАН-ын бүлгийн зөвлөх Б.Энхтүвшин нарын 13 хүн нэр дэвшихээ илэрхийлсэн.

Эднээс намын жагсаалтаар нэр дэвших магадлал өндөртэй нь МАН-ын бүлгийн дарга Д.Тогтохсүрэн аж. Тэрээр УИХ-д хоёр удаа сонгогдохдоо зургаан жил нь бүлгийн даргаар ажиллаж буй. Олонхын бүлгийг эв найрамдалтай авч яваа хэмээн жагсаалтад орох болзлоо хангасан гэж эх сурвалж мэдээллээ.

---