"Өргөө" амаржих газрын дарга асан, анагаах ухааны доктор Ж.Энхцэцэг Эмийн сонсгол, эрүүл мэндийн салбартай холбоотой асуудлаар мэдээлэл хийв.

"Өргөө" амаржих газрын дарга асан, анагаах ухааны доктор Ж.Энхцэцэг:

-Намайг гадагшаа сургалтад яваад ирэхэд "таны талаар ярилаа" гэсэн олон мэдээлэл ирсэн. Би сувгаа урагшлуулаад хоёр хоног уйгагүй үзсэн. Гэтэл сонсголоор эмч, эмнэлгийн ажилтнуудын нэр хүнд их уналаа.

Би сонсголыг бүтэн үзсэн. Манай ээж хараа муутай. Нүдний дусаалга хэрэглэдэг. Гэтэл сонсголоор шаардлага хангаагүй нүдний дусаалгыг зах зээлд гаргасан гээд ярихаар би ээждээ тэр дусаалгыг авч өгсөн юм биш биз гэж бодсон.

Мөн, "мэдрэг чанар нь 20 хувьтай оношлуурыг хэрэглэх боломжгүй" гэдгээ Б.Цэцэгсайхан дарга илэрхийлсэн ч С.Энхболд сайд "худалдан ав" гэж хэлээд, БНХАУ-аас тэр оношлуурыг авсан байгаа юм. Тухайн үед ихээхэн шахалт дарамт ирсэн гэж Б.Цэцэгсайхан ярьсан.

Би "Өргөө" амаржих газрын даргаар ажиллаж байгаад ёс зүйн хариуцлага алдсан гэсэн үндэслэлээр ажлаас халагдсан. Уг нь би ажлын шаардлага тавьж, архидалттай тэмцсэн. Эмийн сонсголоор зөвхөн "Өргөө" амаржих газрыг хөндөн ярьсныг би гайхаж байна. Энэ эмнэлгийн үйл ажиллагаа хэвийн байсан, ковидын хүнд үед манай ажилтнууд маш сайн ажиллаж, халдвартай олон эхийг эсэн мэнд төрүүлсэн.

Миний дараа ажил сайжруулах гэж ирсэн захирлын үед 27, 31 орчим насны хоёр эх эндсэн. Эхийн эндэгдэл гэдэг хүүхдээ төрүүлээд 42 хоногийн дотор эндвэл эхийн эндэгдэлд тооцдог. Би 10-р сарын 13-нд ажлаа хүлээлгэн өгсөн. Намайг байхад Засгийн газраас хяналт шалгалт хийгээгүй атлаа сонсголоор ташаа мэдээллийг өгсөнд би маш их гайхаж байна.

Би захирлаар ажиллахад "Өргөө" амиржих газарт санхүүгийн асуудал байгаагүй. Өр байгаагүй гэдгийг би баттай хэлнэ. Эмийн өр байсан ч түүнийг ЭМД-аас авах байв. "Өргөө" амаржих газарт 43 эх, хоёр нярай эндсэн асуудлуудад ямар хариуцлага тооцсон бэ гэж УИХ-ын гишүүн Ц.Сандаг-Очир асуусан. Энэ асуултад хариулахдаа Эрүүл мэндийн дэд сайд С.Энхболд "Ж.Энхцэцэг даргад хариуцлага тооцсон" гэсэн.

Эмнэлгийн ЭБАТ /эрх бүхий албан тушаалтан/-ууд өнөөдрийг хүртэл юу хийсэн бэ? Сайд, төрийн нарийн бичгийн дарга нар юу хийсэн бэ? Тэд бүх худалдан авалтыг хянах үүрэгтэй шүү дээ. Би одоогоор сүүлийн нэг жил 6 сарын турш ажилгүй байна. "Өргөө" амаржих газар 100 жилийн түүхтэй. Гэтэл энэ байгууллагаар их тоглож байна. Цар тахлын үед бүх эмнэлэг өртэй болсон. Гэтэл сонсголоо зөвхөн нэг эмнэлгийг л онцолж ярьж байгааг ер ойлгосонгүй гэв. 

---