Бага ангийн багш нарын анхдугаар уралдаанд тэргүүн байр эзэлсэн багшид “Монголын оюуны зон олон” ТББ-аас MOZO автомашины 10 сая төгрөгийн хөнгөлөлт гардуулан өглөө. Хөнгөлөлт авсан багш автомашинаа жолоодон, нутгийн зүг хөлгийн жолоо залжээ. 

Бага ангийн багш нарын анхдугаар уралдаан 2024 оны дөрөвдүгээр сарын 04,05-ны өдрүүдэд болсон байна. Монгол Улсын гавьяат багш З.Цэрэннадмидын нэрэмжит Бага ангийн багш нарын анхдугаар уралдаанд нийт 86 багш оролцжээ. Тус уралдааныг “Монголын оюуны зон олон” ТББ-аас дэмжин оролцжээ. “Монголын оюуны зон олон” ТББ-аас тэргүүн байр эзэлсэн багшид MOZO автомашины 10 сая төгрөгийн хөнгөлөлт өгсөн аж.

"Монголын оюуны зон олон" ТББ-ын тэргүүн Д.Дэмбэрэлдорж:

-Монгол Улсын гавьяат багш З.Цэрэннадмидын нэрэмжит Бага ангийн багш нарын анхдугаар уралдаанд дэмжин оролцсон. “Монголын оюуны зон олон” ТББ-аас тэргүүн байр эзэлсэн багшдаа 10 сая төгрөгийн автомашины хөнгөлөлт гардуулан өгч байна. Оюунлаг чадварлаг багш нараа дэмжиж урамшуулах олон ажлын эхлэл болно гэж найдаж байна гэв.

Хэнтий аймгийн Бэрх сургуулийн багш О.Ганбат:

-Бага ангийн багш нарын анхдугаар уралдаанд амжилттай оролцсондоо баяртай байна. Бага ангийн багшаар 20 жил ажилласан. Бага ангийн хүүхдүүд хамгийн үнэнч шударга, цагаахан энергитэй байдаг.

Анхдугаар олимпиадад математик, монгол хэл, хүн байгаль, STEAM болон контент бэлдэж өрсөлдсөн. Амжилттай оролцож MOZO автомашины 10 сая төгрөгийн хөнгөлөлтийг эдэлж автомашин авсандаа тун их баяртай байна гэлээ.

---