Үйлдвэржилтийн байнгын хорооны дарга, УИХ-ын гишүүн Г.Ганболд, УИХ дахь МАН-ын бүлгийн дарга Д.Тогтохсүрэн, УИХ-ын гишүүн С.Чинзориг нар Өвөрхангай аймгийн Баянгол, Төгрөг, Гучин-Ус, Нарийнтээл, Хайрхандулаан, Тарагт, Хархорин, Хужирт, Бат-Өлзий сумдад ажиллаж, бүрэн эрхийнхээ хугацаанд хийж хэрэгжүүлсэн ажлаа тайлагнасан байна. Мөн иргэдийн сонирхсон асуултад хариулж, санал солилжээ.

Баянгол суманд шинээр соёлын төв, цэцэрлэгийн өргөтгөлийн барилга ашиглалтад орсон байна. Мөн 2024 онд 240 хүүхдийн сургууль баригдах юм. Гучин-Ус сумын тухайд 15 ортой шинэ эмнэлгийн барилгатай болжээ. Тус суманд 2024 онд 250 хүний спорт заалны барилгын ажил эхлэх юм.

Нарийнтээл суманд 2024 онд улсын төсвийн хөрөнгөөр сумын төвийн инженерийн шугам сүлжээний ажил хийгдэх бол, Хайрхандулаан суманд өнгөрсөн дөрвөн жилд Эрүүл мэндийн төвийн барилга, "Сумын төвийн шинэчлэл" төсөл, цэцэрлэг, цахилгаан дамжуулах агаарын шугам, дэд станц зэрэг томоохон бүтээн байгуулалтууд хийгдсэн байна.

Тарагт суманд 100.4кв цахилгаан дамжуулах агаарын шугамын дэд станц байгуулснаар сумын дэд бүтэц, иргэдийн амьдрах нөхцөл сайжирч, эрчим хүчний аюулгүй байдал хангагджээ.

Харин Хархорин суманд 2020-2024 онд цэцэрлэгийн өргөтгөл, орчин үеийн стандарт бүхий спорт заал, үерийн далан, гүйлтийн зам, сумын Эрүүл мэндийн төвд тоног төхөөрөмж зэрэг хөрөнгө оруулалт, бүтээн байгуулалтын ажил хийгджээ. Мөн тус суманд 100 хүүхдийн дотуур байр, Онцгой байдлын хэлтсийн барилга баригдаж байна. Энэ онд Хархорин суманд 320 хүүхдийн хичээлийн байр,  хүүхэд, залуучуудын төвийн барилга, 100 ортой нэгдсэн эмнэлгийн барилга, сумын төвийн хатуу хучилттай авто замын ажлууд зэрэг томоохон бүтээн байгуулалтууд хийгдэнэ.

Мөн Хужирт-Бат-Өлзий чиглэлийн хатуу хучилттай авто зам барих ажил хийгдэж байгаа ба ирэх онд ашиглалтад оруулахаар төлөвлөжээ.

Өвөрхангай аймгийн Төгрөг сумын шинэ эмнэлгийн нээлтийн үйл ажиллагаанд УИХ-ын гишүүн Г.Ганболд оролцлоо.

УИХ-ын гишүүн Г.Ганболд:

-Эрүүл мэндийн төвийн хуучин барилгын чанар муудаж, засвар үйлчилгээ хийгээд ч сайжрахгүй байсан. Тиймээс тойргоос сонгогдсон УИХ-ын гишүүдийн хамт шинээр эмнэлэг барих асуудлыг хөөцөлдөж, хөрөнгийг нь улсын төсөвт суулгуулсан юм.

Асуудал ажил хэрэг болж 15 ортой эмнэлгийн шинэ барилга /2024.04.09/ ашиглалтад орлоо. Улсын төсвийн хоёр тэрбум төгрөгөөр баригдсан тус бүтээн байгуулалт нь хоёр давхар ба үзлэг, эмчилгээ, өвчтөний өрөө болон ариун цэврийн өрөөнүүдтэй. Шинэ эмнэлэгтэй болсноор говийн сумдын иргэд маань тав тухтай, тохилог, аюулгүй орчинд эмнэлгийн тусламж, үйлчилгээ авах боломж бүрдлээ гэв.

 

---