Үндэсний их баяр наадмаар ес даван түрүүлсэн улсын арслан М.Бадарчийн допинг хэрэглэсэн гэх маргааныг Монголын олон улсын ба үндэсний спортын арбитрын дэргэдэх допингийн давж заалдах комисс энэ сарын 29-ний өдөр хэлэлцэхээр болжээ.

Энэ талаар Монголын олон улсын ба үндэсний спортын арбитрын дэргэдэх допингийн давж заалдах комиссоос өнөөдөр мэдээлэл гаргасан байна.

Хэвлэлийн мэдээндээ "Монголын олон улсын ба үндэсний спортын арбитрын дэргэдэх допингийн давж заалдах комисс М.Бадарчаас Үндэсний их баяр наадмыг зохион байгуулах хороо, Үндэсний их баяр наадмын үндэсний бөхийн салбар хороо, Монголын үндэсний допингийн эсрэг байгууллага НҮТББ-уудад холбогдох допингийн маргаан хянан шийдвэрлэгдэж байгаа билээ. Бүрэлдэхүүн хуралдааныг 2024 оны дөрөвдүгээр сарын 29-ний өдөр 10:00 цагт хийхээр товлож оролцогч талуудад хуралдааныг товыг хүргүүлсэн болно" гэв.

Мөн хуралдааныг олон нийтэд нээлттэй явуулахаар болсон байна. Дээрх арбитрын хурлаар улсын арслан М.Бадарчийн гомдлыг хангаагүй нөхцөлд, арслан цолыг нь хураах асуудал яригдах юм.

---