Алтай Таван богдын байгалийн цогцолбор газрын аялал жуулчлалын бүсэд Даян нуурын баруун эрэгт олон тооны загас үхсэн тухай мэдээллийг бид өмнө нь хүргэсэн.

Монгол Алтайн нурууны улсын тусгай хамгаалалттай газрын хамгаалалтын захиргаанаас энэ талаар тодруулахад “Нуурын эрэг дагуух хоёр хэсэг бүхий хонхор газарт олон загас боогдож үхсэн. Хамгаалалтын захиргааны байгаль хамгаалагч, мэргэжилтэн, судлаачаас бүрдсэн баг тухайн газарт ажиллаад загас гадны ямар нэг нөлөөгүй, хүчилтөрөгчийн дутагдалд орсон гэж дүгнэсэн. Гол, нуур хөлдөх, гэсэх үед ийм явдал тохиох нь бий. Гэхдээ ШУА-ийн Биологийн хүрээлэнд нарийвчилсан шинжилгээ хийлгэхээр дээж авсан. Үхсэн загаснуудыг нуураас гаргах, устгах, ойр орчмыг ариутгах ажлыг зохион байгуулж байна. Хорогдсон загаснуудын 90 орчим хувь нь Алтайн сугас, үлдсэн нь хадран байсан” гэсэн юм. 

---