2024 оны Монгол Улсын өсвөрийн шатарчдын аварга шалгаруулах шигшээ тэмцээн Улаанбаатар хотноо 4 сарын 1-5 хооронд Миллениум плаза зочид буудалд зохион байгуулагдаж байна.

Тус тэмцээн нь олон жилийн түүхтэй өсвөрийн шатарчдын хувьд хамгийн том бөгөөд тив, дэлхийн аварга шалгаруулах тэмцээнд оролцох эрх олгодог өндөр ач холбогдолтой юм. Энэ жилийн улсын аварга шалгаруулах тэмцээн нь анх удаагаа олон улсын жишгийн дагуу өндөр зэрэглэлд зохион байгуулагдаж байгаа бөгөөд 800 орчим хүүхэд оролцохоор Монгол Улсын 21 аймаг, 9 дүүргээс шалгаран шигшээ тэмцээнд оролцох эрхээ авсан байна.

Энэ жилээс эхлээд МШХ-ны Ерөнхийлөгч С.Наранбатын санаачилгаар өсвөрийн улсын аварга шалгаруулах шигшээ тэмцээний шагналын сан өмнөх жилүүдээс 2,5 дахин нэмэгдэж нас бүрийн ангилалд түрүүлсэн өсвөрийн шатарчин 1,2 сая төгрөгөөр шагнагдах ба нийт шагналын сан 54 сая төгрөгөөс бүрдэж байгаа нь өсвөрийн тамирчдын хувьд өндөр дүн юм.

Энэ жилийн шигшээ тэмцээнийг олон улсын шатрын их мастер, Дэлхийн Шатрын Холбооны төлөөлөгч А.Энхтуул ахлан зохион байгуулж байна.

---